Sekretária Estadu ba Igualdade no Inkluzaun (SEII), Maria José da Fonseca Monteiro de Jesus. Imajen TATOLI/Egas Cristóvão

DILI, 23 novembru 2021 (TATOLI)—Governu liuhosi Sekretária Estadu ba Igualdade no Inkluzaun (SEII) organiza enkontru ho Uniaun Europeia (UE), Nasaun Unida (ONU) no reprezentante sira hosi sosiedade sivíl hodi reflete rezultadu hosi Inisiativa Spotlight.

Notísia Relevante: Inisiativa Spotlight atu halakon violénsia hasoru feto no labarik feto

Iha enkontru dahaat ne’e, komisaun diretiva nasionál revee progresu no diskute asaun sira iha futuru hodi responde ba violénsia hasoru feto no labarik-feto sira-ne’ebé aumenta iha momentu rekuperasaun hosi pandemia COVID-19.

Sekretária Estadu ba Igualdade no Inkluzaun, Maria José da Fonseca Monteiro de Jesus, agradese ba esforsu hotu ne’ebé Governu, parseiru no sosiedade sivil sira halo ona iha inisiativa Spotlight ne’e tanba hatudu progresu ne’ebé signifikativu.

“Ha’u hakarak hato’o ha’u-nia agradese ba ita-nia esforsu hotu. Maske, ita hotu hasoru dezafiu oi-oin tanba movimentu ne’ebé limitadu tanba COVID-19, serka sanitária no inundasaun foin lalais ne’e. Maibé, ita halo ona progresu signifikativu hanesan hatudu ona iha rezultadu hirak ne’ebé aprezenta ona antes ne’e. Ha’u fiar hamutuk ho ONU no Uniaun Europeia, ami sei hadi’a dezempeñu implementasaun nian iha periódu oin mai,” Maria José da Fonseca Monteiro de Jesus hateten liuhosi nia diskursu iha ãmbitu diskusaun kona-ba progresu programa Inisativa Spotlight iha Novu Turizmu, Díli, ohin.

Iha Timor-Leste, Inisiativa Spotlight ne’e implementa hosi ajénsia ONU sira hanesan Internationál Labour Organization (ILO-sigla inglés), Programa Nasaun Unida ba Dezenvolvimentu (PNUD-sigla inglés), Fundu Nasaun Unida ba Labarik (UNICEF-sigla inglés), UNFPA, UN Women no kolaborasaun mós ho sosiedade sivíl no parseiru Governu liuhosi apoiu tékniku no finanseiru.

Programa ne’e, daudaun ne’e apoia projetu sosiedade sivíl hamutuk 22 ne’ebé reprezenta organizasaun parseiru hamutuk 33 iha nivel nasionál no lokál iha munisípiu tolu mak Bobonaro, Ermera no Viqueque. Nune’e, iha faze dahuluk, programa Inisiativ Spotlight sei gasta millaun $4 liuhosi parseiru implementadór sira.

Embaixadór Uniaun Europeia (UE) iha Timor-Leste, Andrew Jacobs, hateten UE apresia servisu koordenasaun ne’ebé ajénsia ONU lima halo ona no UE rekoñese liu-liu kontribuisaun vitál hosi sobrevivente, ativista, defensór, sosiedade sivíl, Governu no lider komunitáriu sira-ne’ebé hola parte ona iha inisiativa ne’e, no dudu ba oin hodi hakotu violénsia bazea ba jéneru iha forma hotu-hotu.

“Hamutuk de’it, ita sei asegura katak feto no labarik feto timor-oan sira seguru no livre atu realiza sira-nia potensiál tomak. Tanba ne’e, ita hakbesik ona ba faze dahuluk nian no feto no labarik feto liu 300.51 (21%) hosi totál populasaun hetan benefísiu hosi Inisiativa Spotlight to’o agora,” nia dehan.

Tanba, nia dehan, Inisiativa Spotlight ne’e bazea ba prinsípiu atu labele husik ema ida iha kotuk no ajuda uluk sira-ne’ebé vulneravel liu.

“Ho razaun ida-ne’e, ami sei halo nafatin servisu iha distritu alvu Ermera, Bobonaro no Viqueque. Tanba sei iha feto no labarik feto sira-ne’ebé ki’ak, feto ho defisiénsia, LGBTI no inan foinsa’e sira-ne’ebé marjinalizadu liu, ne’ebé hein hela ami-nia apoiu,” nia hateten.

Uniaun Europeia no ONU ho Inisiativa Spotlight ne’e atu hapara violénsia hasoru feto no labarik-feto sira foti metodu transformativu ida mak asaun kona-ba mudansa ba lei no implementasaun atu fornese servisu kualidade báziku, maibé mós kona-ba haforsa diretamente movimentu feto no labarik feto sira no responde ba norma sosiál sira.

“Ida-ne’e sai hanesan loron ida ne’ebé mak feto Timor no labarik feto sira sai hanesan sentru ba diskusaun ida-ne’e no mós desizaun komprometidu sira,” nia dehan.

Koordenadór Rezidente Nasõens Unidas, Roy Trivedy, hateten feto no labarik-feto sira iha Timor-Leste iha risku boot liu ba violénsia, tanba pandemia COVID-19 no inundasaun foin lalais ne’e kauza hosi siklone tropical seroja halo sira sai vulneravel liu.

“Ami sente orgullu ho servisu ne’ebé Governu halo. Ajénsia ONU nian, organizasaun sosiedade sivíl no mídia sira halo durante tinan rua ikus ne’e nia laran iha Inisiativa Spotlight. Maske iha tempu defisil, maibé inisiativa ne’e atinje ona feto, labarik-mane, mane no grupu ki’ik sira ho informasaun, treinamentu no servisu,” nia hateten.

Tanba ne’e, ONU iha Timor-Leste sei kontinua servisu hamutuk ho komunidade, Governu no parseiru sira atu elimina violénsia oioin hasoru feto no labarik-feto sira no asegura katak ema hotu-hotu seguru, hetan apoiu di’ak no povu nia direitu fundamentál sira hetan protesaun efetivu.

Entretantu, Inisiativa Spotlight, ne’e lansa ona iha fulan-setembru tinan 2017, nu’udar parseria globál ida-ne’ebé hala’o durante tinan barak entre Uniaun Europeia no Nasõens Unidas atu halakon forma violénsia hotu-hotu hasoru feto no labarik-feto sira.

Notísia Relevante: 2020, Implementa Inisiativa Spotlight ho Orsamentu Millaun $4.28

Ida ne’e reprezenta esforsu globál ida-ne’ebé nunka mais akontese atu investe iha Igualdade Jéneru no empoderamentu feto nu’udar pré-kondisaun no kondutór atu alkansa objetivu dezenvolvimentu sustentavel.

Iha Pasífiku, liu-liu situasaun ne’e hanoin barak no iha nasaun balun iha rejiaun ne’e, 76% hosi feto hetan violénsia fíziku no seksuál durante sira-nia moris tomak no afetadu barak liu mak feto no labarik-feto marjinalizadu hasoru forma diskriminasaun oioin.

Tanba ne’e, iha Timor-Leste, lansa inisiativa Spotlight iha 05 marsu 2020 ho vizaun jerál katak feto no labarik-feto sira goza sira-nia direitu atu moris livre hosi violénsia iha Timor-Leste ne’ebé inkluzivu no igualdade jéneru.

Inisiativa Spotlight ne’e ninia alvu mak investimentu eskala boot hodi elimina forma violénsia hotu-hotu hasoru feto no labarik-feto sira iha Áfrika, Ázia, Caribbean, Amérika Latina no Pasífiku.

Inisiativa Spotlight ne’e hahú iha fulan-janeiru tinan 2020 no finansia hosi UE hodi kontribui substansiálmente ba prevensaun no responde ba violénsia hasoru feto no labarik-feto sira.

Tanba ne’e, iha Inisiativa Spotlight ne’e ema feto no labarik-feto sira liu 357,336 (27%) hosi totál populasaun Timor-Leste nian, hetan ona benefísiu diretamente hosi programa ne’e iha tinan 2019 to’o 2021, nune’e ema na’in-700,000 resin mak hetan mós liuhosi mídia sosiál.

Inisiativa Spotlight aliña ho planu asaun nasionál kona-ba violénsia bazea ba jéneru (NAP GBV) no apoia implementasaun National Action Plan on Gender Based Violence (NAP GBV) iha nivel nasionál no munisipál.

Notísia Relevante: SEII-ONU-UE Inaugura Unidade Koordenasaun Ba Inisiativa Spotligth

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here