Ministru Obras Públikas (MOP), Salvador Eugénio Soares dos Reis Pires no Prezidente Kámara Komérsiu Indústria Timor-Leste (CCITL-Sigla Portugés), Oscar Lima, troka nota protokolu koperasaun iha aréa konstrusaun sivil. Iha salaun Hotel Timor, tersa (23/11). Imajen Tatoli/Francisco Sony

DILI, 23 novembru 2021 (TATOLI)— Ministériu Obra Públiku (MOP) ho Kámara Komersiu Industria Timor-Leste (CCI-TL, sigla Portugés), tersa ne’e, asina akordu kooperasaun pra-kualifikasaun empreza konstrusaun sivíl no konsultoriu téknika iha Timor-Leste, atu konkorre iha konkursu públiku ba obra estadu sira.

Biban ne’e, Ministru Salvadór Eugénio Soares dos Reis Pires, hateten, asina akordu ne’e atu servisu hamutuk hadi’a setór konstrusaun sivíl no obra públika hodi promove infraestrutura públika no hametin parseria setór privadu iha territória nasionál.

“Ita asina akordu ho ba baze implementasaun hosi Dekretu-Lei 17/2021, 22 setembru ne’ebé halo alterasaun dahuluk ba dekretu 27/2010, 22 dezembru, atu halo inskrisaun ba ita-nia empreza sira atu informa ba Governu di’ak liután kona-ba kapasidade finanseira, jestaun no kapasidade ekipamentu rekursu umanu hosi ita-nia setór privadu sira,” Ministru Salvadór, hateten, iha Otél Timor, tersa ne’e.

MOP selebra akordu ne’e tanba CCI-TL mak mahon ba setór privadu hotu, nune’e bele hamutuk ho Governu hodi identifika membru emprezariál sira atubele halo inskrisaun no laiha ona limitasaun hosi setór privadu atu konkorre konkursu públiku.

“Iha Dekretu-Lei antes ne’e fó limitasaun ba setór privadu, maibé ba oin setór privadu bele konkore projetu boot liu miliaun $7,5 ba leten, importante sira mak iha kapasidade no tékniku,” nia akresenta.

Iha fatin hanesan, Prezidente CCI-TL, Oscar Lima, afirma akordu ne’e importante tanba Governu Timor-Leste fó fiar ba setór privadu nasionál atu kaer projetu ho orsamentu boot liu miliaun $1 liuhosi prá-kualifikasaun.

“Ha’u agradese tebes Governu tanba deside ona halo alterasaun ba dekretu-lei hodi fó biban ba setór privadu sira atu kompete iha obra estadu nian, maibé liuhosi pra-kualifikasaun,” nia akresenta.

Ho baze lejizlasaun, MOP konsege kategoriza empreza sira kuaze 700, ne’ebé hosi númeru ne’e prodús ona sertifikadu klasifikasaun ba empreza 697 iha ára konstrusaun sivíl no empreza konsultóriu tékniku sivíl ne’ebé kobre munisípiu 12 inklui Rejiaun Administrasiva Espesiál Oé-Cusse no Ambeno (RAEOA).

Klasifikasaun dahuluk, emperza konstrusaun sivíl fahe ba kategoria A hamutuk empreza 59, ne’ebé bele ezekuta projetu ho valór $1.5000.000 ba leten, kategoria B1 empreza 89 bele ezekuta projetu ho valór $750.000 to’o $1.500.000.

Kategoria B2 ho empreza ne’ebé bele ezekuta projetu ho valór $250.000 to’o $750.000 no kategoria C hamutuk empreza 284 ne’ebé bele ezekuta projetu ho valór $25.000 to’o $250.000 ba leten.

Klasifikasaun daruak, empreza sira iha área konsultóriu téknika fahe ba kategoria A ho empreza haat ne’ebé bele ezekuta projetu ho valór $1,500.000 ba leten, kategoria B1 empreza rua bele ezekuta ho valór $750.000 to’o $1.500.000.

Kategoria B2 ho empreza hitu ne’ebé bele ezekuta valór $250.000 to’o $750.000 no kategoria C laiha.

Empreza konsultoriu tékniku iha Sistema hamutuk 697, hosi totál ne’e empreza 626 simu ina sertifikadu no 71 la konsege hetan sertifikadu tanba la prenxe rekezitu ne’ebé preve iha dekretu-ei 27/2010, 22 dezembru.

Jornalista  : Arminda Fonseca

Editór       :  Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here