Lixu namkari iha àrea merkadu Covalima. Imajen Tatoli/Celestina Teles.

COVALIMA, 23 novembru 2021 (TATOLI)—Adjuntu Sekretáriu Administradór, Francisco de Jesus Alves informa, lixu kontinua namkari iha merkadu Covalima tanba halo jestaun lixu ladún di’ak.

Bazea ba dekretu-lei númeru 33/2008 kona-ba ijiéne orden públiku, lixu iha merkadu presiza mellora di’ak liután.

“Hato’o ba ita-nia maluk emprezáriu sira-ne’ebé iha merkadu, dekretu-lei númeru 33/2008   kona-ba ijiéne orden públiku kona-ba lixu. ita haree lixu iha merkadu presiza atu mellora liután no vendendór sira labele faan iha trotoar leten tuir dekretu-lei ne’ebè vigor ona,” Francisco haktuir ba Agência Tatoli iha nia knar fatin, tersa ne’e.

Nia esplika, problema hirak ne’e tanba vendedór sira seidauk asesu informasaun ne’ebè klaru, nune’e presiza halo tan sensibilizasaun kondisaun iha merkadu Covaima lixu kontinua butuk iha merkadu, tanba halo jestaun lixu ladún di’ak, nune’e xefe jestaun merkadu atu haree kona-ba kestaun ne’e.

“Ita haree lixu la’ós butuk iha merkadu de’it maibè hanesan mòs iha loja sira, halo jestaun lixu la di’ak, ita-boot sira lori ita-boot sira-nia karreta soe iha mota, ida-ne’e kontra dekretu ne’ebé maka ohin ha’u temi,” nia hatutan.

Nia apela ba kompañia sira-ne’ebé mak atu soe lixu labele iha mota laran, tanba Governu kria ona fatin atu soe lixu iha aldeia Haemanu, suku Beco, postu administrativu suai Vila, munisiu Covalima.

“Governu identifika fatin atu soe lixu iha Haemanu. Bainhira loron ruma ita-boot sira soe lixu iha mota, bainhira xefe suku no autoridade lokál hetan ita-boot sira hosi apoiu ho prova ruma, ita boot sira sei hetan sansaun hodi selu koima,” nia hateten.

Bazea ba dekretu lei ne’e sei aplika koima mínimu $1.00 no másimuu $5000 tenke selu bazea ba dekretu-lei ne’ebé mak vigor ona.

Tanba ne’e, Francisco husu ba xefe jestaun merkadu atu halo jestaun lixu ne’ebé mak di’ak, merkadu agora lixu kontinua nakonu iha lixeiru laran no balun namkari iha lixeiru oin, nune’e xefe jestaun atu haree kestaun lixu ne’ebé di’ak lixu iha merkadu nakonu hela de’it tenke soe lixu tuir nia tempu

Nia husu ba emprezáriu sira soe lixu bazea ba oráriu bainhira liu ona oráriu labele soe ona lixu rai de’it iha kioske ka loja oin.

“Ita-boot sira loja boot ne’ebé produsaun lixu barak liu, bainhira selu labele hanesan ho kioske kiik. Bazea ba dekretu-lei ne’e, ha’u sei halo regulamentu, liuhosi ita-nia Diretòr Jestaun merkadu.  Ita hotu tenke kumpre hodi fó ambiente ne’ebé saudável di’ak ba ema hotu,” nia dehan.

Antes ne’e, Servisu Munisipál Jestaun Merkadu no Turizmu munisípiu Covalima, oras ne’e hasai ona sirkulár ho númeru 03/SMGMT/AMC/ I/ 2021 aplika multa $25 to’o $50 ba negosiante sira ne’e soe lixu arbiru.

Sirkulár ne’e hasai hodi regula negosiante sira iha merkadu Covalima bainhira deskobre soe lixu arbiru.

Bazea ba orariu ne’ebé estabelesidu hosi Komite jestaun merkadu  katak atividade rekolla lixu  fahe ba parte dadeer no lorokraik, iha dadeer tuku 06h00 to’o 07h00 no lorokraik iha tuku 18h00 to’o ramata.

Merkadu Covalima nakonu ho taho

Kondisaun Merkadu Covalima nakonu ho tahu bainhira tempu udan. Imajen Tatoli/Celestina Teles.

Entretantu, Diretòr Servisu Munisípál Jestaun Turizmu no Merkadu, Damião Amaral, rekuñese tempu udan merkadu iha munisípiu Covalima nakonu ho taho.

“Ita-nia kondisaun merkadu rua bainhira udan ne’e nakonu ho tahu. Ita-nia merkadu seidauk iha uma taka tomak no seidauk fui alkatraun bainhira udan karik labele iha tahu,” Damião Amaral informa ba Agência Tatoli, iha nia knaar fatin.

Problema kona-ba kondisaun merkadu iha servisu munisipál jestaun turizmu no merkadu nia okos, tanba poder lokál haree liu ba turizmu.

“Ita haree kondisaun merkadu iha territóriu Timor ne’e, nia kondisaun ladún di’ak. Maibé  merkadu iha Covalima, tinan oin, ita sei konstrui uma rua ba vendedór sira hodi fasilita sira atu fila liman,” nia dehan.

Vendedór, Cipriano da Cruz, husu ba parte relevante atu ateru rai-henek iha área merkadu nian, tanba tempu udan merkadu Camanasa nakonu ho taho no kompradór sira labele halo movimentu.

“Ami husu ita-nia administradór no kompañia iha Covalima atu ateru rai-henek iha merkadu hosi fasilita ami bele fila-liman, tanba merkadu nakonu ho taho,” nia dehan.

Ho kondisaun merkadu ne’ebè nakonu ho taho ema labele halo movimentu iha merkadu no la sosa sasán tanba de’it merkadu nakonu ho taho.

Xefe Jestaun Merkadu Covalima, Mafalda Cardoso da Costa, hateten problema ne’e nia parte sei husu ajuda autoridade lokál no kompañia atu ateru-rai henek iha merkadu hodi bele fasilita vendedor faan sasán.

“Smana oin, ha’u sei ko’alia no husu ajuda hosi kompañia sira bele ateru netik rai-henek ba iha área merakadu nian ne’ebé nakonuu ho taho, nune’e vendedór sira atu bele faan sasán ho seguru,” nia dehan.

Nu’udar xefe jestaun, sei buka dalan atu ko’alia ho kompañia hodi bele buka solusaun ba vendedór sira-ne’ebè sira-nia fatin iha merkadu, nakonu ho taho halo sira labele faan no ema labele halo movimentu ba-mai.

Bazea ba dadus hosi servisu Munisípál Jestaun Turizmu no Merkadu hatudu katak merkadu lokál iha munisípiu Covalima hamutuk 10.

Jornalsita : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here