Pesóal saúde sira hala’o atendimentu ba veteranu sira iha sentru saúde Ria-Mare, Vila Antiga, Tersa (22/11). Imajen Tatoli/Natalino Belo.

BAUCAU, 23 novembru 2021 (TATOLI) – Konsellu Munisipál Kombatente Libertasaun Nasionál (CMCLN, sigla Portugés) hamutuk ho pesóal saúde realiza tratamentu saúde ba veteranu Munisípiu Baucau.

Tema hosi programa refere “Hadomi nasaun hadomi veteranu, garantia saúde di’ak ba veteranu, istoria Timór sei hatur iha nia fatin”.

Sekrétariu Jerál Konsellu Munisipál Kombatente Libertasaun Nasionál Baucau, Manuel ‘Alar’ da Costa Soares, hateten, konsellu vetéranu Baukau halo tratamentu tanba durante ne’e veteranu desmobilizadu no kuadru rezisténsia kombatente sira seidauk iha tratamentu saúde afeta hosi tempu luta nian. 

Pesóal saúde sira hala’o hela atendimentu ba veteranu sira iha sentru saúde Ria-Mare, Vila Antiga, tersa (22/11). Imajen Tatoli/Natalino Belo.

“Konsellu veteranu Baucau buka-tuir veteranu sira atu rona sira-nia istoria moras, nune’e médiku espesialista komesa halo atendimentu, buka solusaun ba moras ne’ebé mak sira enfrenta,” Sekretáriu Jeral Konsellu Veteranu Baucau hateten iha Sentru Saúde Ria-Mare, tersa ne’e.

Objetivu hosi programa refere mak fó salva guarda ba veteranu sira atu iha saúde di’ak no iha espasu moris sufisiente nune’e bele konta istória loos ba jerasaun foun sira.

Alari agradese Ministériu Saúde (MS) ne’ebé mak oferese ona espasu sentru saúde Ria-Mare sai klínika ba veteranu sira hodi hala’o atendimentu saúde.

“Ami mós fó espasu ba kbiit laek sira, sei ba mós ba Viqueque, Manatuto no Lospalos,” Alari akresenta.

Veteranu António Avelino da Costa Lopes espresa sentimentu kontente ho programa refere tanba bele hala’o tratamentu saúde ba vetéranu sira nune’e bainhira iha moras ruma halo atendementu lalais.

“Foin dahuluk, maluk barak mak mate tanba atendimentu ladún másimu ba veteran sira,” António hateten.

Tekniku Fisioterápia Ospitál Referál Eduardo Ximenes (HorEX, sigla Portugés), Irene Paula Fraga, hateten, ekipa médiku hosi postu saúde Buacau hamutuk ho konsellu veteranu atu responde ba programa ne’e iha Laga, Quelicai, Venilale no Vemasse.

Iha postu admistrativu Quelicai veteranu ne’ebé partisipa hamutuk 198, Laga hamutuk 56, Venilale 68 no Vemasse 46.

“Kazu ne’ebé ami hetan, hanesan iha Quelicai hamutuk 249 tuir idak-idak nia problema, iha Laga 56 vizitante maibé kazu ne’ebé identifika hamutuk 169 tuir sira-nia kondisaun,” Irene hateten.

Kazu barak liu mak problema ruin no isin ne’ebé hetan torturasaun iha okupasaun, hanesan kazu hetan tiru, baku, kilat musan ne’ebé sei iha isin. Nune’e mós kondisaun fíziku ne’ebé agrave tanba hetan baku ho kilat.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here