Arsebispu Arkidioseze Metropolitana Dili, Don Virgílio do Carmo da Silva, SDB. Imajen/ Egas Cristóvão

OÉ-CUSSE, 23 novembru 2021 (TATOLI) – Arsebispu Arkidioseze Metropolitana Dili, Dom Virgílio do Carmo da Silva, fó-sai katak, Igreja Katólika Timor-Leste nian seidauk simu komunikasaun ofisiál kona-ba vizita Papa Francisco mai Timor-Leste.

Arsebispu Arkidioseze Metropolitana Dili ne’e dehan, vizita Amu Papa mai Timor-Leste sei depende ba iha COVID-19 maibé reprezentante Papa nian iha Timor lori ona mensajen ba Timór-oan sira.

“Maibé to’o agora daudaun ne’e seidauk iha komunikasaun ofisiál atu hato’o mai iha konferénsia episkopál, hodi hatene katak Amu Papa marka ona data definitivu, ne’ebé to’o agora ita seidauk iha desizaun definitivu, tan ne’e maka seidauk halo preparasaun,” Dom Virgílio do Carmo, ba Agência Tatoli iha eskola Santo António Oé-Cusse, tersa ne’e.

Nia dehan, loloos Papa Francisco vizita iha 2020, maibé tanba situasaun pandemia COVID-19 buat hotu kansela tiha, entaun buat hotuhotu paradu to’o agora.

“Maibé sé karik, Amu Papa renova hanesan ita rona no haruka duni karta ofisiál mai, ita sei reativa fila-fali komisaun ne’ebé ita harii ona,” nia katak.

Bainhira iha ona ajenda fisku, parte Igreja sei halo koordenasaun ho Governu nune’e deside portavós ida reprezenta Governu no ida hosi Igreja Katólika, tanba parte rua e’e presiza hamutuk mak organiza vizita ne’e.

“Maibé to’o ohin loron, parte Igreja seidauk hetan informasaun ofisiál no data determinadu ba vizita amu papa nian. Amu papa la’ós vizita de’it Timór, maibé sei vizita mós ba nasaun viziñu sira, hanesan Papua, Singapura, Indonézia, maibé depende fali kazu COVID-19, kuandu tún ona iha esperansa mai iha tinan oin,” nia fundamenta.

Objetivu prinsipál hosi vizita amu papa nian mai Timor-Leste, tanba nu’udar bibi-atan universál Igreja Katólika iha mundu, hodi hametin liután fiar Katólika iha Timor-Leste.

Entretantu, iha tersa-feira lokraik ne’e, Arsbispu Arkidioseze Metropolitana Díli ne’e sei kontinua vizita sarani sira iha sub-rejiaun Nítibe hodi halo serimónia inaugurasaun ba rezidénsia parókia Baoknana.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here