Ekipa jogadór FC Binipu hakat ba 4 finál hafoin halakon ekipa FC Zinter liuhosi suta penalidade. Imajen Tatoli/Abílio Elo Nini.

OÉ-CUSSE, 22 novembru 2021 (TATOLI) – Ekipa hosi FC Binipu hakat ba 4 finál hafoin halakon ekipa FC Zinter liuhosi penalidade iha jogu Kopa Assosiasaun Futeból Oé-Cusse (AFO) sub-22 ho rezultadu 4-3.

Jogu 8 finál ne’e realiza iha kampu futeból Oébau, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA), iha segunda ne’e, nune’e ekipa FC Binipu hakat ba 4 finál hodi hasoru ekipa entre FC Becune no FC São João Baptista.

Iha primeira parte, jogu ne’e hahú ho durasaun tempu menutu 45, ekipa rua ne’e lansa kedas kontra no atake tuir téknika no abilidade ekipa idak-idak nian ne’ebé orienta hosi treinadór sira.

Tanba jogu foin hahú to’o de’it menutu 14, FC Zinter dere guarda FC Binipu liuhosi suta penalidade hosi jogadór Mario Fraz númeru kamizola 14 tanba bola falta, nune’e mós ekipa FC Binipu lansa kedas golu iha menutu 24, liuhosi jogadór Bernardos Abi númeru kamizola 14, nune’e ekipa rua hatuur rezultafu 1-1.

Jogu kontinua la’o to’o menutu 31, FC Zinter lansa-tán golu ida liuhosi jogadór Dino Fraz númeru kamizola 18, nune’e jogu iha primeira parte ho durasaun menutu 45, lidera provizóriu hosi FC Zinter ho rezultadu 2-1.

Hakat fali ba jogu segunda parte ho durasaun tempu hanesan menutu 45, Binipu FC lansa kedas golu iha menutu 55 liuhosi suta penalidade, nune’e jogu segunda parte termina iha menutu 90, ekipa rua ne’e hatuur rezultadu hanesan 2-2.

Tanba rezultadu impata, árbitru sira deside aumenta extra time ho durasaun tempu menutu 30 hodi buka vensedór atu hakat ba jogu iha 4 finál. Nune’e jogu hahú iha parte parte extra time menutu 15, ekipa rua la konsege produs golu maski fó ameasa ba malu ba guada sira maibé la rezulta golu ruma, tama fali ba extra time ho menutu 15 ne’e la muda pozisaun, nune’e rezultadu iha 2-2.

Iha penalidade dahuluk, hahú hosi ekipa Binipu FC konsege lansa golu liuhosi jogadór Aleixo de Jesus Falo númeru kamizola 15, no tuir kedas FC Zinter liuhosi jogadór Arnaldo Hornai númeru kamizola 13 lansa golu, nune’e iha penalidade dahuluk rezultadu 1-1.

Tuir mai, jogadór FC Binipu liuhosi jogadór Jefriano Meni númeru kamizola 17, lansa golu, no tuir kedas Rosário Tefa númeru kamizola 9 hosi FC Zinter lansa golu, nune’e rezultadu penalidade daruak 2-2.

Hakat fali ba penalidade datoluk, FC Binipu la konsege produs golu tanba jogadór Leonardo da Cunha númeru kamizola 8 la konsege produs golu tanba bolu la kona alvu, nune’e fó oportunidade ba jogadór Mario Fraz hosi FC Zinter númeru kamizola 14 lansa golu hodi muda rezultadu ba 3-2.

Ho rezultadu ne’e halo ekipa FC Binipu, hatudu vontade di’ak liután tanba iha penalidade dahaat jogadór Nelson Mendela Nunes númeru kamizola 7 produs golu, no lori sorti di’ak ba FC Binipu, tanba jogadór Nazario Abi hosi FC Zinter númeru kamizola 10 la konsege lansa golu, nune’e muda rezultadu hanesan ba 3-3.

Tama fali ba penalidade ikus nian, FC Binipu lansa kedas golu liuhosi jogadór Silvestre Fraz númeru 16, halo ekipa FC Zinter lakon vontade tanba rezultadu iha ona FC Binipu nia liman, nune’e halo jogadór Dino Fraz númeru kamizola 18 la konsege produs golu.

Nune’e rezultadu iha iha faze ikus liuhosi suta penalidade, ekipa rua konsege produs golu 4-3, FC Binipu lidera provizóriu hodi hakat ba 4 finál.

Nune’e, treinadór FC Zinter, Nilton Boquifai, agradese ba ekipa rua tanba jogu la’o to’o faze ikus mak determina ho penalidade, no nia rekoñese jogadór FC Zinter lakon tanba mentalidade, maibé nu’udar treinadór sei esforsu hodi hadi’a fallansu ne’ebé akontese iha jogu Kopa AFO tinan ne’e, sei hadi’a iha tinan oin.

Nune’e mós treinadór FC Binipu, Januário da Costa, agradese ba ekipa rua tanba iha jogu primeira parte no segunda parte to’o extra time, ekipa rua hatudu sira forsa hanesan.

“Ita haree ekipa rua ne’e jogu no tátika hanesan, ami manán tanba mentalidade de’it, tanba jogadór sira kuandu tama iha faze ikus penalidade, ne’e depende ba mentalidade de’it, no jogu ohin ami iha fallansu, mais ami sei hadi’a, nune’e to’o 4 finál ami bele hatudu jogu di’ak,” nia katak.

Entretantu, jogu ho durasaun tempu menutu 90 no extra time menutu 30 to’o faze penalidade, lidera hosi árbitru Octaviano da Cruz, asistente dahuluk Benedito da Conceição, asistente daruak Armandino do Santos Cusi.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here