Governu Populár Xina liuhosi Embaixadór iha Timor-Leste, Xiao Jianguo, fó apoiu fundu rihun $20 ba GAAC-PR hodi entrega ba Espoza PR, Cidalia Nobre Lopes Mouuzinho Guterres. Imajen/Mídia PR.

DILI, 23 novembru 2021 (TATOLI)—Governu populár Xina, tersa ne’e oferese fundu rihun $20 ba Gabinete de Apoio á Actividade do Cónjuge do Presidente da Republica (GAAC-PR) iha Palásiu Prezidensiál Nicolau Lobato, Bairru Pite, Dili.

Doasaun refere entrega diretamente hosi Embaixadór Xina iha Timor-Leste, Xiao Jianguo ba Espoza Prezidente Repúblika, Cidália Nobre Lopes Mouzinho Guterres, atu hala’o atividade sosiál hodi fó apoiu bae ma kbiit laek sira iha territóriu nasionál.

Notísia Relevante: GAAC-PR Apoiu Instala Bee mos no Eletrisidade ba Kbiit Laek Rogaia Pires

“Embaixada Xina tinan ne’e fó tan apoiu fundu doasaun rihun $20 ba GAAC-PR hodi bele hala’o atividade sosiál sira. Nune’e, agradese ba apoiu no fundu ne’ebé oferese bele uza ho didi’ak dezenvolve nasaun,” Espoza Prezidente Repúblika, Cidalia Nobre Lopes Mouzinho Guterres, hateten ba jornalista sira hafoin simu fundu hosi Embaixadór Xina, Xiao Jianguo.

Iha biban ne’e, Espoza PR relata mós relatóriu ezekusaun fundu ka orsamentu ho nia atividade sosiál sira-ne’ebé antes ne’e hala’o tiha ona ba Embaxadór Xina, Xiao Jianguo.

Embaixada Xina apoiu GAAC-PR dezde iha tinan 2017 to’o agora no kada tinan fó apoiu fundu rihun $20.

Atividade sira-ne’ebé GAAC hala’o iha tinan kotuk mak fó apoiu sosiál sira iha Dili no munisípiu hodi fó apoiu ba vítima inundasaun no insendiu, uma mahon balun hodi atende vítima violénsia doméstika no violénsia seksuál, apoiu ema ho defisiénsia, fó bolsu estudu ba estudante ne’ebé kbiit laek.

Tinan oin, GAAC-PR planea sei fó apoiu subsídiu ba universitáriu sira-ne’ebé akaba ona estudu tama iha prosesu hakerek teze ka monografia no sei realiza programa saúde mak halo sensibilizasaun moras kankru susun ho atividade sira seluk.

Embaixadór Xina iha TL, Xiao Jianguo, afirma kooperasaun ho GAAC-PR durante ne’e la’o kle’ur ona no prontu apoiu nafatin hodi reforsa atividade GAAC-PR ne’ebé atu halo iha tinan sira tuir mai.

Jornalista : Nelson de Sousa

Editór      : Cancio Ximenes  

PUBLISIDADEiklan

HAKEREK NO HATÁN

Please enter your comment!
Please enter your name here