Ministru Administrasaun Estatál, Miguel Pereira de Carvalho. Imajen TATOLI/Francisco Sony.

DILI, 23 novembru 2021 (TATOLI)—Governu realiza inaugurasaun obra hirak ne’ebé finaliza ona iha munisípiu Baucau iha ámbitu komemorasaun loron proklamasaun independénsia 28 Novembru ba dala-46 (28 novembru 1975-28 novembru 2021) ne’ebé realiza iha Baucau.

“Governu realiza atividade oioin no inaugurá projetu sira-ne’ebé finaliza ona iha Baucau iha ámbitu komemorsaun 28 novembru, realiza ona iha segunda ne’e sei to’o iha 28 novembru,”  Ministru Administrasaun Estatál (MAE), Miguel Pereira de Carvalho, hateten ba jornalista sira hafoin relata preparativu loron proklamasaun independénsia ba dala-46 ba Primeiru-Ministru (PM), Taur Matan Ruak, iha Palásiu Governu, tersa ne’e.

Projetu sira ne’e mak Ministériu Turizmu, Komérsiu no Indústria (MTKI) halo lansamentu turizmu komunitária iha Baucau, iha mós programa arvorizasaun iha Venilale ne’ebé organiza hosi Ministériu Agrikultura no Peska (MAP), projetu sira seluk hanesan Programa Nasionál Dezenvolvimentu Suku (PNDS), Uma Kbiit Laek no eskola.

“Ho ida-ne’e, mak ha’u konvida ona alta entidade sira para ba inaugura obra sira-ne’e,” nia haktuir.

Iha hasoru malu ne’e, Governante ne’e atualiza mós ba primeiru-ministru, kona-ba preparativu selebrasaun loron proklamasaun 28 novembru ba dala-46.

“Ha’u informa kona-ba atividade sira-ne’ebé mak hahú ona iha segunda ne’e iha territóriu nasionál inklui atividade desportu komunitária-sira ne’ebé mak organiza hosi Sekretaria Estadu Juventude no Desportu,” nia dehan.

Enkuantu, iha 27 novembru sei selebra misa agradesementu iha igreja Baucau, no kontinua tau ai-funan iha jardim dos herois Fatumaca no ikus mak 28 novembru sei hasa’e bandeira RDTL no iha kalan sei iha divertimentu ka konsertu muzikál iha kampu hasa’e bandeira ne’e.

Partisipa iha loron istóriku ne’e, Governu liuhosi Ministériu Negósiu Estranjeiru no Kooperasaun (MNEK) konvida ona embaixadór sira tantu hirak ne’ebé rezidénsia iha rai-laran no rai-li’úr, no rai-laran komfirmadu ona sei partisipa no rai-li’úr hein konfirmasaun.

Notísia Relevante: Governu aloka rihun $400 ba selebrasaun 28 novembru

Jornalista : Antónia Gusmão

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here