Citilink. Imajen/Google

DILI, 23 novembru 2021 (TATOLI)—Governu planea ona hodi reativa voo komersiál, nune’e asegura konetividade aéreo hafoin suspende tiha durante ne’e, tanba prevensaun no mitigasaun surtu COVID-19 iha Timor-Leste.

“Mai hasoru Primeiru-Ministru relata servisu MTK nian. MTK iha ninia planu rasik atu oinsá mak bele autoriza fali voo komersiál ka regular flight, nune’e asegura konetividade aéreo, katak bele autoriza aviaun sira bele opera,” Ministru Transporte no Komunikasaun (MTK), José Agustinho da Silva, hateten, hafoin relata serbisu ba Primeiru-Ministru (PM), Taur Matan Ruak, iha Palásiu Governu, tersa ne’e.

Desizaun ne’e sei deside hamutuk ho membru ezekutivu sira iha ámbitu reuniaun Konsellu Ministru (KM), ne’ebé sei hala’o iha kuarta (24/11) aban.

“Aban (kuarta) reuniaun konsellu ministru, ha’u sei tau ba ajenda no pronunsia iha reuniun ne’e, nune’e bele hetan apresiasaun membru konsellu ministru hodi nune’e hatuur desizaun koletivamente. Tuir regra ne’e kompeténsia MTK nian maibé liga ho situasaun pandemia COVID-19 entaun ha’u tenke rona mós membru Governu seluk-nia hanoin no Primeiru-Ministru rasik,” nia dehan.

Maske nune’e, MTK sei koordena ho liña ministériu seluk, kompostu hosi Ministériu Interiór (MI), Ministériu Saúde (MS), Sentru Integradu Jestaun Krize (CIGC, sigla portugés) no MTK rasik hodi evita propagasaun surtu COVID-19.

“Nune’e, pasajeiru sira tama mai uza meiu transporte aero, ita iha nafatin kontrolu ne’ebé rigorozu, no kumpri nafatin protokolu saúde mundiál, oinsa mak moras ida ne’e labele hada’et”, nia subliña.

Jornalista : Antónia Gusmão

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here