Ministru Koordenadór ba Asuntu Ekonómiku (MKAE), Joaquim Amaral, atribui sertifíkadu deklarasaun benifísiu ba investór internasionál 3 no nasionál 1. Iha salaun TradeInvesment Dili, tersa (23/11). Imajen Tatoli/Francisco Sony.

DILI, 23 novembru 2021 (TATOLI)—Governu liuhosi Ministériu Koordenadór Asuntu Ekonómiku (MKAE), atribui deklarasaun benefísiu ba empreza haat mak hanesan empreza Keshavarz Great Timor Unipessoal Lda hosi nasaun Iran, empreza Timor Marina Square, S.A hosi Singapura, empreza Fung Ao Seu Unipessoal Lda nu’udar investór nasionál, no empreza Dili Vanilli HMN.

Ministru Koordenadór Asuntu Ekonómiku (MKAE), Joaquim Amaral, konsidera setór ne’ebé empreza sira-ne’e investe iha área produtivu.

Ministru Koordenadór ba Asuntu Ekonómiku (MKAE), Joaquim Amaral, atribui sertifíkadu deklarasaun benifísiu ba investora Marina Square, S.A, Brenda Lei Kuansan. Iha salaun TradeInvesment Dili, tersa (23/11). Imajen Tatoli/Francisco Sony.

“Investór-sira ne’e sei iha korazen determinasaun, lahusik hela sira-nia servisu depois avaliasaun naruk. Sira prenxe rekezitu entaun Estadu iha obrigasaun tuir lei atribui deklarasaun benefísiu ba sira,” Ministru Koordenadór ne’e hateten iha ámbitu atribuisaun deklarasaun benefísiu ba empreza haat ne’e iha salaun reuniaun TradeInvest, Colmera, tersa ne’e.

Governante ne’e akresenta, maske Governu hasoru difikuldade boot hanesan COVID-19 no kalamidade boot maibé konsege atribui deklarasaun benefísiu ba empreza haat, ne’e grasa boot ida tanba prosesu ne’e la’ós fasil no sira mós hasoru difikuldade tanba sira-nia atividade mós balun realiza ona iha terrenu.

“Sira konsege persiste entaun ita hotu-nia agradesementu boot ba sira tanba sira-nia korajen boot, sira lahusik servisu ne’ebé sira halo daudauk ona hafoin hetan impaktu hosi kalamidade ne’ebé akontese, nune’e mós surtu COVID-19,” nia salienta.

Membru ezekutivu ne’e konsidera, investimentu ne’ebé aprova maske na’in-haat maibé ninia valór signifikante tebe-tebes ba iha dezenvolvimentu ekonómiku.

Diretór Ezekutivu TradeInvest, Arcanjo da Silva, haktuir  bazea ba lei investimentu privadu númeru 15/2017 no dekretu Governu númeru 2/2018, ne’ebé fó mandatu ba tradeinvest hanesan odamatan ba prosesu atribuisaun deklarasaun benefísiu no akordu espesiál investimentu, odamatan atendimentu ba investór no importadór sira hala’o ona prosesu durante tinan 2020-2021 ba proposta 21 mak tama iha odamatan TradeInvest nian.

“Durante tinan rua (2020-2021), MKAE atribui ona deklarasaun benefísiu hitu iha tinan 2020, no prosesu ba pendente-sira hosi 21 ne’e, ohin loron atribui tan deklarasaun benefísiu haat ba empreza haat tuir lei investimentu privadu ni dekretu Governu,” nia dehan.

Empreza haat ne’ebé simu deklarasaun investimentu Keshavarz Great Timor Unipessoal Lda hosi nasaun Iran, foku ba setór investimentu agrikultura, veterenáriu no agrikultura, investimentu hala’o daudauk ona, lokál investment iha Dili-Hera.

Empreza Timor Marina Square, S.A hosi Singapura, setór investimentu turizmu no ninia fatin investimentu Dili-Lecidere. Enkuantu empreza Fung Ao Seu Unipessoal Lda nu’udar investór nasionál sei investe iha plantasaun hare iha munisípiu no Welaluhu munisípiu Manufahi, ikus liu mak empreza Dili Vanilli HMN lokál investimentu iha Aileu-Seloi, setór investimentu iha arigultura liu-liu plantasaun baunila.

Tipu investimentu hirak ne’ebé atribui, MKAE konsege aprova no atribui deklarasaun benefísiu ba empreza haat ne’e, Governu sei mobiliza tuir proposta aprova iha meza tékniku TradeInvest Timor-Leste ne’ebé partisipa hosi entidade relevante tuir ida-idak-nia setór.

Governu sei mobiliza totál investimentu hamutuk, empreza Keshavarz Great Timor Unipessoal Lda sei mobiliza kapitál investimentu millaun $2, empreza Timor Marina Square, S.A hosi Singapura millaun $50.

Nune’e, empreza Fung Ao Seu Unipessoal Lda ho kapitál investimentu millaun $25 no empreza Dili Vanilli HMN kapitál investimentu $294,350.

Totál empregu ne’ebé sei kria iha faze inisiu hosi empreza Dili Vanilla empreza traballadór nasionál 17, empreza Fung Ao Seu Unipessoal Lda sei empreza traballadór nasionál 66, Empreza Timor Marina Square, S.A sei emprega iha faze inisiu to’o faze konstrusaun traballadór nasionál hamutuk 420, no empreza Keshavarz Great Timor Unipessoal Lda sei emprega traballadór iha inisiu hamutuk na’in-20.

Enkuantu, kapitál investimentu ne’ebé MKAE aprova no atribui deklarasaun benefísiu iha tinan 2020 mobiliza millaun $8-resin no sira-nia produtu balun sirkula ona iha merkadu nasionál.

Reprezentante empreza benefisiaria, Brenda Lei Kuansan, sente onradu tanba iha ona deklarasaun investimentu, nune’e promete sei realiza planu investimentu sira ne’ebé planea ona.

“Onra boot ida mai ha’u hodi simu sertifikadu investimentu. Liuhosi empreza Timor Marina Square, S.A ami sei harii konstrusaun rua ne’ebé luxu hanesan edefísiu boot ba rezidénsia nomós eskritóriu ho valór investimentu entre millaun $30 to’o millaun $50. Projetu ida-ne’e sei duni kontribuisaun ida-ne’ebé signifikadu ba país la’ós de’it atu sei serve hanesan sasukat atu enkoraja investór rai-li’ur sia (9) atu hakat no involve iha ekonomia nasaun nian, no sei kria barak ba timor-oan sira no sei sai fatin profisionál ba oportunidade úniku,” nia dehan.

Objetivu empreza nian mak sei kria setór ekonómiku ida-ne’ebé buras iha Dili, atu nune’e bele dudu kresimentu ne’ebé boot iha Timor-Leste.

Jornalista : Antónia Gusmão

Editór       : Cancio Ximenes

PUBLISIDADEiklan

1 KOMENTÁRIU

  1. Tebes ka lae? sira nia osan montante refere iha konta bankaria iha DILI?? keta halo ibun ho papel deit laiha osan, mai bosok-bosok deit ita para foti hotu ita nia osan ba sira nia Rain. kuitadu.

HAKEREK NO HATÁN

Please enter your comment!
Please enter your name here