Produtu lokal ne'ebé negosiante sira faan iha área seremonia 28 novembru Darsula, segunda (22/11). Imajen Tatoli/Natalino Belo.

BAUCAU, 22 novembru 2021 (TATOLI) – Feira nasionál hodi komemora loron Proklamasaun Independénsia 28 Novembru ba dala-46 hahú lansa iha Darsula, Suku Gariuai, Baucau Vila, munisípiu Baucau, segunda ne’e.

“Feira hahú ohin loron, sei remata iha dia 28 novembru, durante loron neen buat barak mak sei akontese sei iha konsertu muzikais,” Prezidente Komisaun Organizadora atuál Ministru Administrasaun Estatal, Miguel Pereira de Carvalho, ko’alia iha ámbitu lansamentu feira ne’e iha Darsula, segunda ne’e.

Prezidente Komisaun Organizadora ne’e agradese ba Ministériu Turizmu, Komérsiu no Indústria (MKTI) nu’udar na’in ba feira ne’ebé mak reuni komersiante hotu partisipa iha feira nasionál hodi komemora loron 28 Novembru.

Liuhosi feira nu’udar dalan atu hasoru malu hodi halo divertimentu hamutuk tantu joven no katuas sira hodi festeza loron Proklamasaun Independénsia.

Ministru Turizmu, Komérsiu no Indústria, José Lucas do Carmo da Silva, hateten, feira nasionál importante tebes hodi komemora loron Proklamasaun Independénsia nian ba dala-46.

Liuhosi feira ne’e iha grupu sira partisipa atu hetan vizita hosi vizitante sira hahú hosi agrikultór, komérsiu no indústria, sosiedade sivíl no grupu juventude sira hodi halo promosaun ba sira-nia produtu.

“Governu iha programa oinsá atu fasilita apoia lori fali ita-boot sira liuhosi programa kréditu,” José akresenta.

Nune’e mós liuhosi feira dalan atubele lori komunidade ne’ebé mak laiha movimentu atu sira-nia produtu fa’an iha feira, aprezenta kreatividades no inisiativa.

Tuir observasaun Agência TATOLI iha terrenu, kuaze maioria institusaun governu hahú hosi institusaun tutela sira hola parte hotu iha feira nasionál refere.

Alende ne’e, iha mós grupu agrikultór, sosiedade sivíl no empreza públiku sira-ne’ebé mak kada stand hatudu produtu inklui kreatividade.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here