Estudante Ensinu Sekundária Jeral Dom Martinho da Costa Lopes, hala’o ezame pasajen klase. Imajen Tatoli/Sérgio da Cruz.

BOBONARO, 23 novembru 2021 (TATOLI) – Ensinu Sekundáriu Jerál (ESJ) Dom Martinho da Costa Lopes Maliana, tersa ne’e realiza ezame pasajen klase ba estudante sira.

Diretór Ensinu Sekundáriu Jerál Dom Martinho da Costa Lopes Maliana, Juvençio de Jesus, fó-sai katak, estudante sira hahu ona ezame pasajen klase iha loron 22 novembru, maibé parte eskola la hetan alokasaun orsamentu konsaun eskolár hodi prepara folla ezame ba estudante sira.

“Ezame etapa primeiru ne’e ami sei simu, maibe iha segunda faze mai to’o agora realiza ezame pasajen klase no besik tama tán ba ezame nasionál nian ona mós  ami seidauk hetan osan konsesaun eskolár. Ida-ne’e mak sai dfikuldade boot ba ami,” nia ko’alia iha Maliana, tersa ne’e.

Dirijente eskola ne’e dehan,  maski durante ne’e la hetan orsamentu konsesaun eskolár, maibé problema ne’e la’ós sai obstákulu atu la avansa ba ezame paisajen klase ne’e.

Parte dirijente eskola tuur hamutuk ho konselu profesór sira buka mekanismu deve hela loja sira-nia materiál hanesan surat-tahan mutin no tinta hod fasilita eskola bele realiza ezame ba estudante sira.

“Depois osan konsesaun eskola sai mak ita entrega fali osan sira-ne’e ba loja na’in, liuhosi maneira sira hansan mak ezame bele la’o, sé lae ita labele realiza,” nia katak.

Estudante Miguel Angelo Correia, hateten, maske la partisipa aula prezensiál ho normál hanesan tinan kotuk, maibeé nu’udar estudante nafatin preparadu atu hasoru ezame.

“Hahú horisehik to’o ohin ha’u sente ezame la’o di’ak, tanba durante Covid-19 iha uma, ami estuda matéria sira-ne’ebé profesór sira fó, iha ezame ne’e matéria sira-ne’e barak mak sai, ne’ebé ha’u sente ami bele komprende,” nia katak.

Entretantu, estudante hosi ESJ Dom Martinho da Costa Lopes Maliana ne’ebé partisipa iha ezame pasajen klase ne’e hamutuk 1,624 komposta hosi désimu-anu 890 no désimu segundu-anu 734.

Jornalista         :Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here