Dom Virgílio inaugura EBC terseiru siklu Katólika Santu Antonio RAEOA. Imajen Tatoli/Abílio Elo Nini.

OÉ-CUSSE, 23 novembru 2021 (TATOLI) – Arsebispu Arkidioseze Metropolitana Dili, Dom Virgílio do Carmo da Silva, tersa ne’e halo inaugurasaun ba Ensinu Báziku Sentrál (EBC, sigla portugés) terseiru siklu, Santu Antonio, Numbei, suku Costa, sub-rejiaun Pante Makassar.

Konstrusaun ba projetu ne’e ezekuta hosi empreza Oé-Japa Unipesoál Lda, ho valór kontratu rihun $160 ne’ebé apoia hosi Arsbispu Arkidioseze Metropolitana Díli, hodi konstrui fasilidade sira mak hanesan, sala aprendizajen 14, edifísiu ida, sala ba laboratóriu ka biblioteka, kompleta no fasilidade dapur, hariis-fatin no tanke bee-moos. Projetu ne’e ho durasaun durante fulan lima, hahú iha maiu to’o outubru 2021.

Nune’e, Arsbispu Arkidioseze Metropolitana Díli, Dom Virgílio do Carmo da Silva, apela ba estudante no atu uza fasilidade ne’e didi’ak atu buka matenek, tanba estudante hala’o estudu iha eskola Katólika tenke hatudu diferénsa iha sosiedade. 

Dom Virgílio inaugura EBC terseiru siklu Katólika Santu Antonio RAEOA. Imajen Tatoli/Abílio Elo Nini.

“Dioseze agradese ba padre pároku, tanba durante ne’e la’ós tau-matan de’it iha parókia maibé dezenvolve mós infraestrutura lubuk ida iha eskola Katólika ne’e, ha’u husu estudante sira, fatin iha ona, uza didi’ak ba hodi buka matenek no formasaun oinoin, hatudu nafatin disiplina, labele estraga sasán ne’ebé ita konstrui ona,” Dom Virgílio do Carmo da Silva, ko’alia iha serimónia inaugurasaun ne’e.

Dom Virgílio fundamenta, prinsípiu nasiolizmu no vizaun amu pároko iha Oé-Cusse, atu konsentra alunu sira hotu hosi eskola primária to’o sekundária iha fatin ida de’it.

Sekretária Rejionál ba Asuntu Edukasaun Solidariedade Sosiál no Inkluzaun, Evalina da Costa, informa, lei baze edukasaun previstu ona kona-ba aprendizajen ba ensinu báziku sira.

Tan ne’e, RAEOA iha ona ensinu báziku terseiru siklu iha ona eskola 18 eskola públiku, hamutuk ho eskola báziku katolika rua (2), no eskola CAFE ne’ebé iha RAEOA iha eskola báziku hamutuk 21.

“Autoridade agradese ba Igreja Katólika Timor-Leste nian, hodi bele estabelese eskola ida-ne’e, nune’e fasilita oan sira uza oportunidade tama eskola iha ensinu báziku,” nia katak.

Entretantu, Diretór Eskola KatÓlika Santu Antonio Oé-Cusse, Padre Albino Marques, agradese ba Arsebispu Arkidioseze Metropolitana Dili, tanba dioseze mak finansia orsamentu, no kompleta hosi parókia nune’e maka foin konstrui infraestrutura edukasaun ba estudante sira.

Diretór eskola ne’e fó sai katak, totál estudante hala’o estudu iha eskola Katólika Santu Oé-Cusse Oé-Cusse hamutuk na’in 1.685, komposta hosi eskola pre-primária na’in-75, eskola primaria hamutuk na’in-230.

Nune’e mós ekola pre-sekundária hamutuk na’in-650 no eskola sekundáriu hamutuk na’in-730, ho totál profesór iha ensinu sekundária na’in-32, funsionáriu permanente na’in-11, ba ensinu pre-sekundáriu hamutuk na’in-18.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here