Feto ruràl iha Covalima partisipa formasaun kona-ba igualdade jenéru. Imajen Tatoli/Celestina Teles.

COVALIMA, 23 novembruu 2021 (TATOLI)—Centro Comunidade Covalima (CCC), liu hosi ekipa programa dezenvolvimentu feto ruràl fasilita formasaun ba feto ruràl sira kona-ba igualdade jenéru. 

CCC realiza formasaun ne’e ho objetivu atu hasa’e delegada no feen-laen sira-nia koñesimentu kona-baigualdade jenéru liu-liu knaar no responsabilidade uma laran hodi hamenus konflitu. 

“Bazea ita rona informasaun ne’ebé mak iha, sira ladún komprende família uma laran, tanba ne’e mak ita fasilita formasauun hodi hasa’e sira-nia koñesimentu kona-ba igualdade jenéru iha uma laran entre feen-laen bele fahe servisu ho di’ak,” Fasilitadór Programa Igualdade Jenéru Centro Comunidade Covalima, Tereza Maria Moniz, hateten ba jornalista sira, tersa ne’e. 

Formasaun ne’e foka liu ba feen ho laen, nune’e feen ho laen bele fahe servisu iha uma laran hanesan no labele fó servisu de’it ba parte ida. 

“Bazea ba kultura mane mak iha papel liu, tanba ne’e ami fó formasauun ba feen-laen, nune’e bele komprende servisu uma laran,” nia dehan.

Partisipante, Cariana Elsa Barreto Amaral, sente kontente bele heten oportunidade hodi tuir formasaun kona-ba igualdade jenéru. 

“Liuhosi formasaun ne’e, ami família uma laran bele fahe serbisu no fo tempu ba malu, nune’e ami bele armoniza liután família uma laran, atu evita violénsia domestika akontese iha uma laran,” nia dehan.

Formasaun ne’e CCC hala’o durante loron tolu ne’ebé partisipante sira mai hosi suku sira hanesan suku Ogues, Camanasa, Suai Loro no Matai iha munisípiu Covalima.

Jornalsita : Celestina Teles

Editór      : Cancio Ximenes. 

PUBLISIDADEiklan

HAKEREK NO HATÁN

Please enter your comment!
Please enter your name here