Estudante 10 Desembru Comoro Dili, bainhira tuir ezame ba terseiru periódu nian, segunda (22/11). Imajen Tatoli/Antonio Goncalves

DILI, 22 novembru 2021 (TATOLI)–Ministériu Edukasaun Juventude no Desportu (MEJD) segunda ne’e realiza ezame pasajen klase ba estudante na’in-247.757 iha territóriu nasionál inklui Rejiaun Administrativu Espesiál Oé-Cusse Ambeno (RAEOA).

“Estudante 247.757 ne’e kompostu hosi ensinu báziku primeiru to’o terseiru siklu oitavu anu 209.133, ensinu sekundáriu jerál 28.376 no estudante ensinu sekundáriu tékniku vokasionál hamutuk 10.248,” Diretór Jerál Ministériu Edukasaun Juventude no Desportu (DJ-MEJD), Luis Manuel da Costa Fernandes informa ba jornalista sira.

Nia dehan, ezame pasajen klase ba estudante sira iha territóriu nasionál inklui Rejiaun Administrativu Espesiál Oekusi Ambenu (RAEOA) ne’e, hahú hala’o ohin (segunda, 22/11) no sei finaliza iha loron 27 novembru semana oin.

Ba tinan ida-ne’e, totál estudante hosi ensinu báziku to’o ensinu sekundáriu jerál tékniku vokasionál mak tuir ezame pasajen klase no ezame nasionál hamutuk 35.981. Hosi totál númeru ne’e, 247.757 mak tuir ezame pasajen klase no 58.224 prepara ba ezame nasionál.

Aleinde totál númeru estudante ne’ebé tuir ezame, nia relata, totál eskola iha territóriu nasionál inklui RAEOA hahú hosi ensinu báziku to’o ensinu sekundáriu jerál no tékniku vokasionál hamutuk 1.198.

Hosi total númeru eskola ne’ebé mensiona, eskola ensinu báziku Sentrál no Filiál hamutuk 988, eskola ensinu sekundáriu jerál (ESJ) 111, no eskola tékniku vokasionál hamutuk 59.

Jornalista : Tomé Amado

Editór    : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here