Sekretáriu Estadu Juventude no Desportu, Abrao Saldanha, hamutuk ho autoridade Bobonaro no joven eleitu suku sira baku hela babadok, hodi halo lansamentu ba programa formasaun nasionál joven eleitu suku iha Bobonaro. Imajen Tatoli/Sérgio da Cruz.

BOBONARO, 22 novembru 2021 (TATOLI) – Sekretáriu Estadu Juventude no Desportu (SEJD), Abrao Saldanha ‘Nokosiku’, segunda ne’e, halo lansamentu nasionál ba programa formasaun joven eleitu suku iha munisípiu Bobonaro.

Programa formasaun joven eleitu suku ne’e foka liu ba planeamentu, proposta, monitorizaun no relatóriu ne’e, lansa iha munisípiu Bobonaro. Programa ne’e mós sei hahú iha munisípiu Aileu, Ainaro, Covalima, Ermera, Liquiça, Manufahi no Viqueque durante loron lima.

Sekretáriu Estadu Juventude no Desportu, Abrão Saldanha ‘Nokosiku’, hateten,  programa ne’e hanesan polítika Governu nian atu hakbesik liután serbisu públiku ba joven no komunidade sira iha baze no atu identifika problema no difikuldade ne’ebé joven sira hasoru iha suku no aldeia transforma ba iha nível governasaun lokál no sentrál.

“Sekretáriu Estadu Juventude hili joven na’in-rua ba iha eleitu suku ne’e hanesan parseru prinsipál nune’e ajuda haboot liután desportu iha kraik no ajuda kria espasu barak liután ba joven sira iha suku to’o aldeia atu realiza sira-nia poténsia hodi dinamiza sira-nia atividade atubele kontribui sira-nia enérjia ba dezenvolvimentu nasionál,” Governante ne’e hato’o intervensaun iha suku Ritabou, postu administrativu Maliana, munisípiu Bobonaro.

Nia subliña, durante loron lima formandu sira sei kapasita joven eleitu suku sira, oinsá atu  deskobre no identifika problema sira iha baze transforma fali sai planu no halo proposta.

SEJD mós halo hela rekrutamentu ba joven sira atu destaka iha nível postu administrativu sira no kada postu sei koloka ema na’in-rua nune’e bele dinamiza atividade SEJD nian iha área desportu no estímula kreatividade joven sira iha baze.

Enkuantu iha semana kotuk, SEJD asina ona akordu interogániku delegasaun kompeténsia ba matéria desportu nian ho Ministériu Administrasaun Estatál (MAE) nune’e atu hakbiit no mobiliza joven sira iha atividade desportiva no seluk tán.

Entretantu, Sekretáriu Autoridade Munisipál Bobonaro, Júlio Carvalho Caero, apresia ho programa governu ne’e tanba iha ona interese fó oportunidade ba joven sira iha baze atu espresa sira-nia talentu no kreatividade iha área desportu.

“Ami Bobonaro prontu koopera ho programa SEJD nian, ita espera ho programa sira-ne’e bele hadi’a ita-nia juventude sira-nia talenta. Ne’e duni ha’u husu ba ita-nia joven eleitu suku sira, aproveita didi’ak oportunidade ne’e hodi aumenta imi-nia kapasidade atubele dezenvolve imi-nia an,”Autoridade ne’e fó hanoin.

Joven eleitu suku Atabae, Casimiro Leite Soares, sente kontente tanba hetan oportunidade partisipa iha formasaun durante loron lima hodi hakbiit kapasidade, oinsá iha kompeténsia atu organiza joven sira iha desportu. 

Joven Eleitu Suku Atabae, Casimiro Soares Leite. Imajen Tatoli/Sérgio da Cruz.

“Ha’u iha esperansa bainhira termina formasaun ne’e, ha’u ba iha suku fahe fali esperiénsia ba joven sira atu organiza sira-ne’ebe durante ne’e sei subar sira-nia talentu no balu sei ta’uk atu hatudu ba públiku tanba ita-nia governu komesa loke matan mai ita joven sira iha área rurál,” nia katak.

 

Enkuantu joven eleitu iha munisípiu Bobonaro ne’ebé partisipa iha formasaun ne’e hamutuk 100 mai hosi suku 50 no postu administrativu neen.

Totál orsamentu ne’ebé SEJD aloka ba  Sentru Juventude Munisípiu Bobonaro (SJMB) ho montante $20,070,00. Hosi montante finansia atividade serimónia lansamentu $3,070 no restante gasta ba atividade formasaun.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here