Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 22 novembru 2021 (TATOLI)—Ministru Administrasaun Estatál (MAE), Miguel Perreira de Carvalho, informa Prezidente Repúblika, Francisco Guterres Lú OLo sei prezide selebrasaun loron proklamasaun independénsia 28 Novembru ba dala-46 (28 novembru 1975-28 novembru 2021), ne’ebé sei realiza iha munisípiu Baucau.

Notísia Relevante: Komemorasaun Proklamasaun Independénsia hahú ho feira nasionál iha Baucau

“Atividade prinsipál 28 Novembru iha domingu sei konbina serimónia hasa’e bandeira iha Baucau ne’ebé prezide direita hosi Prezidente Repúblika,” Ministru Miguel Perreira de Carvalho hateten ba jornalista sira hafoin ramata sorumutu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, segunda ne’e.

Sekuénsia iha serimónia ne’e Xefe Estadu sei fó kondekorasaun ba veteranu hamutuk na’in-50, no serimónia ne’e ramata iha tuku 16h00, hodi hatun bandeira RDTL ne’ebé sei prezide hosi Prezidente Parlamentu Nasionál, Aniceto Longuinhos Guterres Lopes.

Durante sorumutu, Prezidente Komisaun Organizadora ba komemorasaun 28 novembru no atuál Ministru MAE, Miguel Perreira de Carvalho, relata prosesu preparativu sira-ne’ebé ho másimu tebes ba PR Lú Olo.

Selebrasaun loron proklamasaun indepedénsia 28 Novembru tinan ne’e, komisaun organizadora hamutuk ho komunidade sira iha munisípiu Baucau ne’ebé estabelese ona realiza atividade lubuk ida ne’ebé hahú hosi 12 novembru halo abertura desportu komunitária iha territóriu tomak.

Nia dehan, iha segunda 22 novembru ne’e iha lorokraik hahú realiza feira ne’ebé organiza hosi Ministéiru Turizmu Komersíu Indústia (MTKI) iha Baucau, no iha 27 novembru sei hala’o mós misa agradesimentu iha igreja Baucau, hafoin kari ai-funan iha jardim do herois da patria Fatumaca (Gariuai) no iha kalan kontinua atividade konsertu musikál ho feira.

Komisaun organizadora hahú ko’alia ho konsellu veteranu munisípiu Baucau hodi organiza atividade sira seluk.

Selebrasaun loron proklamasaun ba tinan ne’e ho tema ‘A união e a luta conjunto, para a vitória de todos’.

Ministru dehan, komisaun organizadora hili tema ne’e atu husu timor-oan hotu atu unidu hodi manan luta hamutuk tanba Timor-Leste daudaun ne’e hasoru situasan COVID-19 ho mós okorensia dezastre naturál 04 abríl liu-bá, no situasaun defisíl sira-ne’ebé sei hasoru tan ho situasaun la-niña ne’ebé tuir previzaun metrolojia katak sei akontese udan no anin boot iha tinan ne’e to’o ba tinan oin, tanba ne’e importante tebes atu timor-oan hotu unidu hamutuk iha luta ida-ne’e.

Enkuantu, iha selebrasaun loron proklamasaun tinan ne’e Governu prevee orsamentu por volta rihun $400.

Notísia Relevante: Preparasaun 28 Novembru iha Baucau atinje 65%

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here