PA RAEOA hatuur fatuk dahuluk ba projetu instalasaun liña eletrisidade iha Nítibe-Pássabe. Imajen/mídia ZEESM.

OÉ-CUSSE, 22 novembru 2021 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, segunda ne’e hatuur fatuk dahuluk ba instalasaun iluminasaun liña eletrisidade iha sub-rejiaun Nítibe no Pássabe.

Autoridade RAOEA halo lansamentu ba projetu instalasaun liña eletrisidade ba komunidade suku lima iha sub-rejiaun Nítibe no suku tolu iha sub-rejiaun Pássabe.

“Tanba autoridade hakarak tinan ne’e rezolve hotu liña eletrisidade iha sub-rejiaun haat ba trajetu fatin izoladu sira iha teritóriu Oé-Cusse, autoridade lakohi ema ida sei hela iha nakukun, tanba ne’e mak iha tinan ne’e ita hahú rezolve daudaun, ita-nia tarjetu hakarak to’o 2022 fatin izoladu sira asesu hotu,” Arsénio Paixão Bano informa ba jornalista sira iha Oé-Cusse, segunda ne’e.

Nia fó-sai katak, politíka ne’e, autoridade halo atu kompleta de’it iluminasaun eletrisidade ba populasaun iha teritóriu Oé-Cusse, tanba uluk mandatu Mari Alkatiri nian rezolve ona 95%, nune’e agora atu ba 100%, hodi fasilita estudante sira bele estuda ho di’ak no ajuda mós komunidade atu uza ba nesesidade uma laran no atividade ekonomia.

Xefe Suku Usitacu, Hilario Babu, informa tinan ne’e rezolve ona komunidade sira, liuliu iha fatin izoladu sira atu hetan eletrisidade.

“Agradese ba autoridade tanba tinan barak ona, Governu la tau matan, maibé to’o tinan ne’e tanba Oé-Cusse oan mak jere ukun iha Oé-Cusse, hadomi nia povu hodi rezolve ona komunidade sira-nia ezijénsia, liuliu iha fatin ne’ebé izoladu iha teritóriu Oé-Cusse,” lidér lokál ne’e orgullu.

Entretantu, projetu instalasaun ne’e maioria uza baixu tensaun ho kilómetru 8,7 kobre iha sub-rejiaun Nítibe no Pássabe, no ezekuta ba fatin rua ne’e hosi empreza Elo Manu Benu Unipesoál Lda, sei halo instalasaun iha sub-rejiaun Nítibe ba fatin izoladu sira mak hanesan, bairru Binaos, Kabuka Tubu, Fatusobe no Nunumtasa, suku Usitacu, nune’e mós iha Lelain, Taep, Bebo, Cabana, suku Suni-Ufe inklui Hauboni suku Taiboko, sub-rejiaun Pante Makassar.

Nune’e mós kontinua ba sub-rejiaun Pássabe sei halo instalasaun hahú hosi Bisine, Nunsena, Nun-Atais no Ato, suku Abani ho valór kontratu $260,617.91, ne’ebé aloka hosi Orsamentu Jerál Estadu (OJE) 2021.

Projetu liña eletrisidade iha sub-rejiaun Nítibe no Pássabe ne’e rezolve uma-kain 204 ho totál populasaun 969, komposta hosi sub-rejiaun Nítibe, bairru Binaos uma-kain ualu (8), Lelain Bebu uma-kain 12, Taep uma-kain 15, Kabuka Tubu uma-kain ualu (8) no Fatusobe uma-kain 26.

Hakat fali ba sub-rejiaun Pássabe iha Nunumtasa uma-kain 12, Bisene uma-kain 22, Nunsena uma-kain 23, Nun-Atais uma-kain 22, Ato uma-kain 13, inklui sub-rejiaun Pante Makassar iha Hauboni uma-kain 64 no Cabana uma-kain 30.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here