Jogadór FC Amor Oébau selebra vitória hafoin halakon FC Sebuki iha 8 finál iha Kopa AFO. Imajen Tatoli/Abílio Elo Nini.

OÉ-CUSSE, 21 novembru 2021 (TATOLI) – Ekipa FC Sebuki, domingu ne’e sai hosi jogu Kopa Asosiasaun Futeból Oé-Cusse (AFO) 2021 nian hafoin derrota iha jogu 8 finál hasoru FC Amor Oébau liuhosi suta penalidade ho rezultadu 4-2.

Ekipa FC Sabuki sai kampiaun Kopa Assosiasaun Futeból Oé-Cusse (AFO) ba sub-22 iha 2019, maibé iha tinan 2021 sai iha 8 finál hafoin lakon ho FC Amor Oébau.

Jogu 8 finál ne’e realiza iha kampu futeból Oébau, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA), nune’e FC Amor Oébau hakat ba 4 finál, sei hasoru entre ekipa FC Sarankeu no FC São Fransisco Oémolo.

Jogu iha primeira parte ho durasaun tempu menutu 45, ekipa rua lansa kontra no atake tuir téknika no abilidade ekipa idak-idak nian ne’ebé orienta hosi treinadór sira.

Amor Oébau iha ambisaun maka’as tanba jogu foin tama ba menutu 10, jogadór Alarico Mota númeru kamizola 11 lansa kedas golu ida hosi hatuur rezultadu 1-0, nune’e FC Sebuki kontinua atake maka’as to’o fali menutu 21 lansa fali golu liuhosi jogadór Constâncio Oqui númeru kamizola 12, nune’e jogu primeira parte ho durasaun tempu menutu 45 ekipa rua hatuur rezultadu 1-1.

Hakat fali ba jogu segunda parte ho durasaun menutu 45, ekipa rua ne’e hatudu idak-idak nian tátika no estratéjia, nune’e to’o menutu 60, FC Sebuki liuhosi jogadór Constâncio Oqui lansa-tán golu daruak hodi muda rezultadu 2-1.

Ho rezultadu ne’e, FC Amor Oébau hahú muda estratéjia hodi troka guarda no jogadór sira, ho estratéjia ne’e iha duni rezultadu tanba to’o de’it menutu 69 jogadór Alarico Mota lansa golu hodi muda rezultadu ba 2-2.

Tanba jogu segunda parte hodi kompleta durasaun tempu menutu 90, ekipa rua prodús rezultadu hanesan, nune’e árbitru aumenta-tán extra time durante menutu 30 hodi buka vensedór iha 8 finál hodi hakat ba 4 finál.

Iha extra time ne’e ho durasaun menutu 15, ekipa rua hatudu forsa hanesan maske ameasa ba malu liuhosi guarda sira maibé la rezulta golu ruma. Purtantu, hakat fali ba jogu segunda parte ho durasaun menutu 15, ekipa rua ne’e hahú lansa kontra no atake, nune’e to’o de’it menutu 19, Amor Oébau FC lansa golu liuhosi jogadór Ronaldinho Cardoso númeru kamizola 12 hodi muda rezultadu ba 3-2.

Ho rezultadu ne’e ekipa FC Sebuki ameasa tuir kedas, iha menutu hanesan 19 menutu, lansa fali golu liuhosi jogadór Constâncio Oqui, nune’e jogu extra time durante menutu 30 ekipa rua hatuur rezultadu hanesan 3-3.

Tanba rezultadu hanesan, nune’e árbitru sira lori-tán ekipa rua ne’e ba faze finál liuhosi suta penalidade, kada ekipa deside jogadór na’in-lima reprezenta klubu.

Iha suta penalidade dahuluk, hahú hosi ekipa FC Amor Oébau, liuhosi jogadór médiu Eujebio Pereira númeru kamizola 10 konsege lansa golu, no tuir kedas ekipa FC Sebuki liuhosi jogadór avansadu Constâncio Oqui númeru kamizola 12 lansa golu, hodi hatuur rezultadu 1-1.

Tuir mai, jogadór Alarico Mota númeru kamizola 11 hosi FC Amoru Oébau lansa golu, ho rezultadu ne’e lori sorti di’ak ba ekipa FC Amor Oébau tanba jogadór Herculana Nono númeru kamizola 7 hosi FC Sebuki la konsege prodús golu iha penalidade daruak tanba la kona alvu rede, nune’e rezultadu lidera provizóriu hosi FC Amor Oébau 2-1.

Hakat fali ba penalidade datoluk, ekipa Amor Oébau iha ona sorti di’ak hasa’e liután vontade no esperansa katak, sei sai vitória iha 8 finál ne’e hodi hakat ba 4 final, tanba jogadór Ronaldinho Cardoso lansa golu, maibé jogadór Juvito Eco númeru kamizola 11 hosi FC Sebuki nafatin la prodús golu, nune’e rezultadu aumenta ba FC Amor Oébau 3-1.

Kontinua ba penalidade dahaat, jogadór 19 Juvito Pereira Falla lansa golu, no tuir kedas FC Sebuki mós hanesan la produs golu, liuhosi jogadór Octaviano Nono númeru kamizola 10, nune’e rezultadu iha penalidade dahaat nafatin 3-1.

Purtantu hakat fali ba penalidade ikus nian, Amor Oébau prodús golu liuhosi jogadór Mouzinho de Deus númeru 14, no tuir kedas FC Sebuki liuhosi jogadór Mariano Elo númeru kamizola 9 produs golu, nune’e ekipa FC Amor Oébau ofisiálmente lidera provizóriu hodi hakat ba 4 finál ho rezultadu 4-2.

Ho rezultadu ne’e, treinadór FC Sebuki, Minguel da Conçeição, lamenta tanba jogu entre parte rua deskonfia iha interese ba klubu FC Amor Oébau, nune’e nia parte preparadu atu hato’o karta sujestaun, nune’e bele hadi’a iha futuru.

“Jogu iha-ne’ebé de’it iha lakon no iha manán, importante jogu ne’e labele iha interese apoiu ekipa seluk, ne’e labele. Ohin, ita haree árbitru ho nia asistente sira, la tuir ona regulamentu, jogu ita haree la’o sala dala barak, tanba ne’e sei hato’o karta protesta hodi sujere atu hadi’a ba jogu oin mai,” nia lamenta

Purtantu, treinadór FC Amor Oébau, Octaviano Cofitalan, agradese tanba jogadór sira hatudu unidade no tátika, tanba hakat ba 4 finál.

“Ami manán iha penalidade, ne’ebé pozisaun ami hein de’it sei hasoru ekipa seluk iha 4 finál, ami preparadu,” nia orgullu.

Entretantu, jogu ho durasaun tempu menutu 90 no extra time menutu 30 to’o faze penalidade, lidera hosi árbitru Candido da Costa Tefa, asistente dahuluk Octaviano da Cruz, asistente daruak Benedito da Conceição.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here