Prezidente eleitu TLPU, Candido Alves no Sekertáriu Jerál, Zezitu da Silva, hato'o sira nia diskuru bainhira hafoin fó sai rezultadu votasaun, iha salaun Delta Nova, sábadu (13/11). Imajen TATOLI/Francisco Sony

DILI, 22 novembru 2021 (TATOLI)—Estrutura Timor-Leste Press Uniaun (TLPU) lideradu Candido Alves, segunda ne’e aprezenta estrutura foun ba Sekretáriu Estadu Komunikasaun Sosiál (SEKOMS), Merício dos Reis “Akara” no informa kona-ba planu halo konferénsia no edifísiu atu hala’o knaar.

“Ohin, ami mai aprezenta an, tanba iha loron 13 fulan-novembru ne’e ami eleitu ona hosi kongresu TLPU nian. Entaun, ohin ami mai aprezenta ba Sekretáriu Estadu Komunikasaun Sosiál kona-ba ami-nia estrutura. Iha reuniaun ne’e, iha pontu rua ne’ebé estrutura TLPU hato’o mós ba SEKOMS mak fasilita fatin (edifisiu) ba TLPU no mós konferénsia ne’ebé TLPU planu atu hala’o,” Prezidente TLPU, Candido Alves, hateten ba jornalista sira hafoin hala’o sorumutu ho SEKOMS, Merício dos Reis “Akara”, iha Palásiu Governu, Dili.

TLPU husu atu Sekretáriu Estadu bele fasilita fatin atu sai edifísiu tanba bainhira ko’alia kona-ba instituisaun ida mak laiha fatin, entaun laiha identidade no susar ita atu hala’o servisu ho di’ak no responsabilidade.

Tanba, nia dehan, to’o agora TLPU seidauk iha fatin própriu hodi hala’o reuniaun ka servisu ruma, maibé kada reuniaun ne’ebé iha TLPU utiliza fain seluk atu hala’o reuniaun no hala’o servisu.

Antes ne’e, TLPU ko’alia ona ho Conselho de Imprensa (CI), maibé Conselho de Imprensa hateten fatin iha maibé nia kondisaun mak aat hela.

“CI dehan atu oferese fatin ida iha Fundu Mídia (FM) ba TLPU maibé to’o agora seidauk iha informasaun. Ami sei atualiza nafatin ba Prezidente CI, lahatene to’o bainhira mak bele hetan fatin, maibé ba loron 100 hakarak ka lakohi ita tenke hakat ba oin,” nia dehan.

Hosi preokupasaun ne’e, Akara hateten TLPU bele ba ko’alia ho Conselho de Imprensa bainhira laiha loos ona dalan, entaun bele hakat fila-fali mai SEKOMS.

“Entaun, ami hein katak sei semana oin laiha, ami tenke mai dere fali Sekretáriu Estadu nia odamatan hodi buka tuir,” nia informa.

Alende ko’alia kona-bá fatin, TLPU mós hato’o ba SEKOMS kona-bá konferensia ne’ebé TLPU planu realiza, tanba misaun ida ne’ebé iha kongresu TLPU nian fó ba estrutura iha loron 100.

Tanba, nia dehan, TLPU iha planu ida katak antes tama ba iha kampaña ba eleisaun prezidensiál 2022, TLPU tenke halo konferénisa ida hodi halibur jornalista hotu atu fó hanoin kona-ba mata-dalan ba eleisaun jerál no hein katak SEKOMS bele fasilita.

Entretantu, estrutura foun TLPU nian Prezidente Candido Alves, Vise-Prezidente Embelina Amaral, Sekretáriu Jerál Zezito da Silva, Vise-Sekretáriu Jerál Marcelino Bata no Tezoreira, Efigenia Texeira.

Notísia Relevante: Candido Alves eleitu ba Prezidente TLPU períodu 2021-2025

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here