Prokuradór Distritál Baucau, Ambrósio Rangel Freitas, ne'ebé simu posse hosi Prokuradór Jerál Repúblika, Alfonso Lopez, segunda (22/11). Imajen Tatoli/Natalino Belo.

BAUCAU, 22 novembru 2021 (TATOLI) – Prokuradór Jerál Repúblika Alfonso Lopez, segunda ne’e fó pose ba Prokuradór Distritál Baucau foun, Ambrósio Rangel Freitas.

Prokuradór Jerál Repúblika, Afonso Lopez, sente onradu no haksolok tanba hafoin asume kna’ar foin dahuluk fó pose ba prokuradór distritál ida.

“Doutór Ambrósio nu’udar prokuradór ne’ebé esperiénsia, integridade, liuliu tanba uluk asume nu’udar prokurador xefia iha distritu Oecuse tinan-ida no fulan-neen, entaun konsellu deside pur-unaminidade hili doutór Ambrósio atu asume kna’ar todan liután,” PJR Alfonso Lopez, ko’alia iha Ministériu Públiku (MP) Vila Nova, Baucau. 

Prokuradór Jerál Repúblika, Alfonso Lopez, Prokuradór Distritál Baucau, Ambróso Rangel Freitas inklui konvidadu sira foto hamutuk hafoin serimónia pose iha edifísiu MP Baucau, segunda (22/11). Imajen Tatoli/Natalino Belo.

Alfonso konsidera Prokuradoria Repúblika Distrital Baucau durante ne’e prosesuál ba kazu kompleksu kategoria númeru daruak hafoin Dili, maske prokuradór sira-ne’ebé situa iha ponta-leste ladún barak kompara ho Dili.

“Nia iha kapasidade atu dirije, xefia Ministériu Públiku ida-ne’e,” Afonso akresenta.

Prokuradora Distritál Baucau sesante, Remígia Fátima Soares ne’ebé durante ne’e sai dirijente iha Baucau no daudaun-ne’e asume fali Adjunta Prokuradora Jerál Repúblika.

Razaun pose iha Baucau tanba hakarak fó koñesimentu mós ba autoridade munisipál sira, institusaun Polísia Nasionál Timor-Leste (PNTL) munisípiu Baucau, Viqueque, Lautém no Manatuto inklui Sosiedade Sivíl ne’ebé iha área justisa nian.

Prokuradór Distritál Baucau daudaun ne’e hamutuk na’in-haat komposta hosi na’in-ida situa nu’udar delegasaun iha munisípiu Viqueque, enkuantu na’in-tolu seluk mantein iha Baucau. Nune’e Prokuradór Distritál Baucau, Ambrósio Rangel Fatima asume kna’ar ne’e ho durasaun tinan-tolu.

Iha fatin hanesan, Komandante PNTL Munisípiu Manatuto, Superintendente João da Costa, prontu kolabora ho prokuradór distritál foun tanba importante tebes institusaun rua nu’udar parseiru iha justisa.

“Komandante PNTL ho Prokuradór tenke serbisu hamutuk tanba ami-nia objetivu ida de’it mak prosesa kazu ruma bele hetan rezultadu ne’ebé di’ak atu nune’e vítima mós sente kontente ho ninia prosesa tomak,” João hateten.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here