Estudante sira Eskola Sekundária Katólika Nossa Senhora de Fátima (NOSSEF) Railaco tuir hela ezame. Imajen Tatoli/António Gonçalves

DILI, 21 novembru 2021 (TATOLI)–Estudante rihun 34,136 hosi munisipiu Aileu no Viqueque sei partisipa ezame pasajen klase hahú segunda 22 to’o 27 novembru 2021 tanba estudante sira preparadu ona.

Estudante sira-ne’e kompostu hosi alunu ensinu báziku primeiru to’o terseiru siklu, oitavu ano inklui ensinu sekundáriu jerál no tékniku vokasionál.

Diretora Servisu Edukasaun Munisípiu Aileu, Cristina da Conceição relata informasaun ne’e katak sira iha preparasaun ida di’ak tanba durante ne’e prosesu ensinu aprendizajen másimu tebes no estudante sira simu matéria mós kompletu.

“Ita laiha problema ho matéria ba alunu sira durante ne’e. Sira simu kompletu, tan ne’e ita garante katak segunda ne’e sira sei tuir ezame pasajen klase ho di’ak,” Cristina hateten ba Agência Tatoli liuhosi telefónika, domingu ne’e.

Iha munisípiu Aileu totál estudante atu partisipa iha ezame pasajen klase ne’e hamutuk 12,723. Hosi totál númeru ne’e kompostu hosi estudante ensinu báziku hosi primeiru to’o terseiru siklu oitavu anu 10.703, kompostu hosi mane 1.517 no feto 5.186.

Ba Ensinu Sekundáriu Jerál (ESJ) totál estudante 1.849 kompostu hosi mane 857 no feto 992, no Ensinu Sekundáriu Tékniku Vokasionál (ESTV) totál estudante 171 kompostu hosi mane 77 no feto 94

Diretór Servisu Edukasaun Munisípiu Viqueque, Emídio Amaral, hateten maske durante ne’e munisípiu Viqueque hetan implementasaun estadu emerjénsia tanba COVID-19 maibé la hamate espíritu no vontade profesór no estudante sira-nian atu tuir prosesu aprendizajen.

“Aban, ita-nia estudante hahú ezame datoluk ba pasajen klase nian. Eskola sira mós prepara hotu hodi fó ezame ba estudante sira,” Emidio Amaral ba jornalista Agência Tatoli, iha Viqueque Vila, domingu ne’e.

Iha tinan ida-ne’e, Munisípiu Viqueque konsege rejista estudante na’in-21.413 mak prontu atu partisipa iha ezame pasajen klase. Hosi totál númeru hirak ne’e, estudante hosi ensinu báziku primeiru to’o terseiru siklu oitavu anu hamutuk 18.047.

Entretantu estudante Ensinu Sekundáriu Jerál ne’ebé preparadu ona hamutuk 3.162 no ensinu sekundáriu tékniku Vokasionál hamutuk 204. Enkuantu Munisípiu sira seluk inklui Dili to’o agora sei hasoru difikuldade ho dadus estudante sira-ne’ebé atu tuir ezame.

Jornalista : Tomé Amado/Vitorino Lopes da Costa

Editór      ; Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here