Klubu Mushila. Imajen Tatoli/Hortencio Sanches.

DILI, 20 novembru 2021 (TATOLI) –Kabun parte esensiál ida iha isin-lolon ema nian. Kabun, fatin sirkulasaun ai-han. Ai-han ba moris. Ai-han ba saúde. Iha kabun, iha moris. Iha kabun iha saúde.

Iha isin-lolon ema nian, haree ba dimensaun, iha kabun-ki’ik no iha mós kabun-boot. Kabun ki’ik ka boot, sai mós idolu ida. Kabun ki’ik ka boot, sai mós esforsu ida. Esforsu atu halo ki’ik bolu “sixpack” bainhira kabun-boot sai mós ona “trend” ida. Esforsu atu haki’ik kabun bainhira boot nakfila ona mehi ema nian atu hadi’a nia aparénsia iha públiku-fiar aan, auto-konfiansa, iha ne’ebé no bainhira de’it.

Realidade ida, timoroan sira ne’ebé hamahon aan iha Klube Futsál Mushila, FC hatudu. Katak, tan kabun-boot, la’ós atu hatuun ka hasa’e maibé enkoraja timoroan sira ne’e hamosu inspirasaun foun. Tan kabun-boot, timoroan sira ne’e, ransu-malu hamosu inisiativa foun; harii Klube Futeból, Mushila FC – klube ida ne’ebé mós agora famozu los iha Pra Liga Futsal Timor – Leste, ne’ebé la’o hela.

Istória kontinua konta. Memória nafatin lembra, iha espasu no husi tempu ne’ebé liu ona no sei mai, hodi fó-sasin kona-ba lala’ok no ain-le’ut oinsá Klube futsál Mushila, FC harii. Klube ne’e harii iha tinan 2016 liubá, husi grupu ki’ik ida ne’ebé idéntiku ho kabun-boot tan mesak “kabun-boot” de’it.

“Momentu ne’ebá ami iha grupu rua, harii klube rua; ida naran Mushila, ida naran pasta, lian Portugés mak Mushila ho lian Tetun mak pasta. Tanba saida mak ami harii klube rua ne’e? Tanba, maioria kolega-sira ami ransu-malu hamutuk ne’e mesak kabun-boot de’it. Ema bolu ami pasta tanba kabun-boot, ne’e mak ami kontinua motiva aan hodi harii tiha ba klube,” Sekretáriu Jerál Mushila hanesan mós na’in hosi klube Mushila FC, Farão Belo, konta ba Agência TATOLI iha Pateo Dili, foin lalais ne’e.

Liafuan kabun-boot sai ona roman inspirasaun ida. Liafuan kabun-boot, hafolin ida mehi nia folin. Liafuan kabun-boot, haboot ona realidade ida. Basá, ho liafuan kabun-boot, motiva ona “kabun-boot” sira, harii ona grupu ki’ik rua kompostu husi ema na’in 10-resin mak envolve iha grupu ki’ik ne’e nia laran. Tempu la’o, ema sira ne’ebé hola parte iha grupu ki’ik ne’e nia laran mós iha ona hanoin ne’ebé la hanesan, nune’e ikusmai grupu ki’ik ne’e naksobu. Klube pasta lakon. Hamriik de’it mak Mushila.

“Ami iha grupu ne’e gosta sunu-malu, halo ami-nia unidade ladun iha. Entaun sira balun sai tiha ba harii fali klube ida Mau Putar ne’e. Agora-sira mós famozu iha Pra Liga Futsal. Ami mantein ho Mushila,” nia haktuir.

Maski grupu ki’ik ne’e naksobu, la fó obstakulu negativu ba Mushila FC atu eziste no buras. Biar membru sira balun iha grupu ki’ik ne’e fahé-malu, la sai razaun atu Mushila FC hakat ba oin; ho fuan-boot, ho esperansa, ho dignidade, maske hasoru sasidik-barak.

“Mushila ami harii ne’e mesak kolega de’it, ne’ebé uluk ransu malu hosi ki’ik to’o boot. Bainhira Mushila hamrik nunka hanoin atu partisipa iha Pra Liga, maibé Asosiasaun Futsal Timor – Leste loke inisiativa ne’e ami mós ba rejistu tanba ami-nia rival Mau Putar mós ba rejistu hotu, ida ne’e mak ami foin kompete-malu ho di’ak tanba sira mak ami-nia adversáriu,” nia dehan.

Bainhira partisipa iha Pra Liga Futsal iha 2020, Mushila la partisipa de’it maibé hatudu mós nia kreatividade iha kampu. Kuandu hola parte iha eventu Pra Liga Futsal iha 2020, Mushila FC hatudu mós nia talentu liuhusi nia jogadór sira, hodi hetan “vitória”, hodi fó-aplaus ka basa-liman ba adeptu sira, ba klube.

Tanba ne’e, iha jornada Pra Liga Futsal iha 2020, to’o ohin loron, jogu besik ramata ona, iha tabela klasifikasaun provizóriu Mushila FC rekolla ona pontu 58 iha pozisaun Segundu Lugar no Primeiru Lugar mak Ramelau FC.

Iha jogu kompetitivu barak mak liu ona, Klube Mushila FC, husi jornada primeiru to’o 23 joga ona dala-23. Entre jogu 23 ne’e, Mushila FC manan dala-18 no lakon dala ida. Husi rezultadu ne’e hatudu katak Klube Mushila FC la ‘halo arrenpede’ adeptu sira maibé hanesan klube ida ne’ebé iha duni kapasidade tékniku, estratéjia, mentál no forsa hodi kompete ho rivál sira iha kampu-laran durante jogu to’o ohin loron. Orgullu ida.

“Ha’u kontente tebes, ha’u-nia jogadór sira hatudu jogu ne’ebé di’ak manan klube jigante-sira iha Pra Liga ne’e, hanesan: Ramelau, Becuse United FC, Mauputar FC no Boa Sorte. Sira ne’e ekipa forte los maibé ami manan ida ne’e orgullu ida ba ami,” Klube-na’in ne’e dehan.

Ho nune’e, Mushila FC kontinua firme. Firme iha prinsípiu. Kompromete ba objetivu. Mushila FC, hamriik-metin maski nakdoko maibé anin esperansa sempre motiva Mushila li hosi atividade oioin ne’ebé Mushila realiza maski iha Pra Liga Futsal Mushila seidauk hetan osan ruma maibé nafatin fuan-boot, aten-brani, lori futeból ba oin.

Objetivu Mushila nafatin promove juventude-sira nia talentu lori futeból ba oin oinsá hadi’a joven-sira-nia moris, hadook aan hosi violénsia, promove dame.

Mushila la’ós iha klube de’it

Inisiadór Mushila FC la’ós de’it kreativu hodi hamosu klube maibé mós iha hanoin inovativu. Katak, alende harii Klube Mushila FC maibé mós hamosu atividade kreativu seluk hodi anima ema hotu ho atividade oioin hanesan organiza konsertu, realiza family fun bike ba labarik, joven sira, komunidade, no seluktan.

“Ami la’ós iha bola de’it. Ami hala’o atividade barak halibur ita-nia artista timoroan-sira realiza konsertu múzika–ami konvida artista ne’ebé mak iha nia múzika rasik, ezemplu iha artista sira ne’ebé mak labarik ki’ikoan-sira gosta, artista balun ne’ebé mak tiu katuas-sira gosta, artista balun ne’ebé feto klosan-sira gosta ne’e mak ami konvida. Oinsá atu akomula família-sira ami hala’o mós atividade family fun bike ba joven no labarik-sira bele sae bisikleta,” Klube-na’in Mushila FC, Farão Belo relata.

Farão esplika, objetivu hala’o atividade konsertu no family fun bike ne’e hodi halibur artista-sira. Bainhira hetan osan hosi atividade sira hala’o ne’e hosi fa’an tikete to’o atividade hotu artista hirak ne’ebé partisipa ne’e bele fahe-malu hanesan ho Mushila FC maski Mushila FC mak hanesan pioneiru ka na’in ba atividade.

“Ami hala’o atividade-sira ne’e dalan ida mós atu tulun ita-nia artista-sira tanba ita haree iha Timor – Leste artista barak halo múzika maibé ladun hetan koñesimentu di’ak hosi Governu. Ezemplu, ita-nia populasaun Timór uitoan hela maibé ita-nia múzika tau iha Youtube ema konsumu oioin- asiste milaun ida resin, signifika ita-nia múzika ema rai-li’ur mós asiste, problema ne’e mak ita-nia artista-sira produtivu ne’e ladun hetan atensaun másimu,” nia kompara.

Tanba ne’e, Mushila nia progarama no atividade atu tulun joven-sira iha área desportu no múzika hanesan mós kria kampu traballu ba joven-sira liuhosi atividade oioin ne’ebé joven-sira gosta.
Atividade hanesan family fun bike no konsertu múzika Mushila FC realiza dala-haat ona iha Timor – Leste no ba oin sei kontinua realiza nafatin tanba Mushila sempre apoiu hosi nia patrosinadór permanente Banco Nacional Comércio de Timor – Leste (BNCTL), Malilait Bike no seluktan halo Mushila iha vontade atu realiza nafatin atividade-sira.

Jornalista: Hortencio Sanchez

Editór: Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here