Komisária Nasionál Direitu Labarik Dinorah Granadeiro oferese prezente bisikleta ho materiál eskola nian ba manan na'in daruak Nayla Safirah. Imajen Tatoli/Arminda Fonseca.

DILI, 20 novembru 2021 (TATOLI) – Komemorasaun loron mundiál ba labarik sira, Komisaun Direitu Labarik (KDL) serbisu hamutuk ho The United Nation Children Emergency Fund (UNICEF) realiza kompetisaun dezeñu ba labarik sira hahú hosi tinan lima to’o 12 iha Timor Plaza.

“Objetivu hosi kompetisaun pinta ida-ne’e hanesan ita hotu hatene katak ohin loron 20 novembru hanesan loron mundiál ba labarik sira, ita Timor-Leste selebra ba dala-18. Atu selebra ba loron mundiál labarik ida ne’e mak Komisaun Direitu Labarik serbisu hamutuk ho UNICEF, Timor Plaza ho parseiru sira seluk realiza atividade ida-ne’e ba ita-nia oan sira hahú hosi tinan lima to’o 12,” Komisária Nasionál Direitu Labarik, Dinorah Granadeiro informa ba Agência Tatoli iha Timor Plaza, Dili, sábadu ne’e.

Ativadade pintura ne’e nu’udar animasaun ida ba labarik sira atu selebra sira-nia loron tanba ohin loron Estadu fó rekoñese loron 20 novembru nu’udar loron ba labarik sira atubele goja sira-nia direitu labarik nian. 

Komemora loron mundiál labarik, Komisaun Nasionál Direitu Labarik hamutuk ho UNICEF realiza atividade kompetisaun dezeñu ba labarik sira hahú hosi tinan lima to’o 12, iha Timor Plaza, Dili. Imajen Tatoli/Arminda Fonseca.

Nia fó-sai katak, partisipante sira-ne’ebé kompete ba kompetisaun dezeñu ne’e hamutuk 100-resin, manan na’in sira hahú hosi manan na’in dahuluk to’o datoluk sei hetan prezente bisikleta ho materiál eskola nian, nune’e hosi manan na’in dahaat to’o daneen sei hetan pasta inklui materiál eskola nian.

“Maibé ita-nia kompetente sira seluk ne’ebé maske la sai vensedór maibé sira nafatin hetan sira-nia direitu labarik nian, hetan nafatin prezente hanesan materiál eskola nian,” nia hateten.

Iha kompetisaun dezeñu refere, fahe ba grupu tolu, kada grupu ida pinta la hanesan. Grupu dahuluk pinta loron matan, tasi, ikan no loron-matan.

Labarik sira hahú hosi tinan lima to’o 12, hala’o kompetisaun pintura iha Timor Plaza, Dili. Imajen Tatoli/Arminda Fonseca.

Grupu daruak pinta uma, ema, animál no grupu datoluk pinta jardín ai-funan no ai-funan. Kompetisaun ne’e hala’o hahú hosi tuku 10:45 no ramata iha oras 11:45. 

Rezultadu hatudu na’in-neen mak sai vensedór, hanesan vensedór dahuluk Elvyn, daruak Naylah  Safirah, datoluk Giovania Sonia, dahaat Alfin Manuel do Rosário, dalima Alícia Borges no daneen Jasmin Martins.

Manan na’in Naylah Safirah kontente tebes tanba barak mak kompete maibé nia mak sai vensedór ba dezeñu refere.

Jornalista         : Arminda Fonseca

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here