Komisaun Instaladora Desterradu Ataúro (KIDA), sábadu ne'e, realiza konferénsia iha Viqueque. Imajen Tatoli/Vitorino Lopes da Costa.

VIQUEQUE, 20 novembru 2021 (TATOLI) – Komisaun Instaladora Desterradu Ataúro (KIDA), sábadu ne’e, realiza konferénsia dahuluk hodi forma estrutura organizasaun refere iha munisípiu Viqueque.

Koordenadór KIDA 1980-1987, Agustinho Gregorio Romo ‘Teki-Luro’ hateten, konferénsia munisípál atu estabelese estrutura komisaun nian iha munisípiu Viqueque ho objetivo atu prepara aan ba Kongresu Nasionál.

Nia dehan, ne’e fó biban liu ba autór desterradu polítiku sira fó liman ba malu, kooperasaun di’ak, hanoin ho konstrutivu, hamutuk dudu prosesu tomak iha Timor-Leste.

Tanba durante barak iha faze ukun rasik-aan, seidauk iha hanoin ida atu hari’i organizasaun ida mak sai mahon ba eis-desterradu polítiku ho ninia jerasaun sira.

“Hahú ohin ba oin ita eis-desterradu polítiku sira hamutuk fila-fali, maske hasoru dezafiu oinoin, maibé ho vontade di’ak bele organiza-aan ho lema ‘hametin istória hodi kontribui ba dezenvolvimentu Timor Lorosa’e’, tanba nasaun ita hotu ninia responsabilidade,” Koordenadór KIDA, Agustinho Gregoro Romo ‘Teki-Luro ba Agência Tatoli, iha salaun adiministrasaun munisípiu Viqueque, sábadu ne’e.

Agostinho hatutan, autór desterradu politíku Ataúro ho nia jerasaun partila valór istóriku sobrevivente kona-ba envolvimentu populasaun husi suku no aldeia iha munisípiu Viqueque tantu feto-faluk, oan-kiak no nurak oan sira iha momentu Timor hahú istória moruk no nakukun.

Ho ida-ne’e, Komisaun Instaladora Desterradu Ataúro hakarak estabelese estrutura iha munisípiu liuhosi konferénsia hodi diskute vizaun, misaun no objetivu ne’ebé hakerek ona iha rajimentu interna KIDA 1980-1987 nian.

Prezidente KIDA Munisípiu Viqueque, Cosme Sarmento, konsidera oportunidade ida-ne’e desteradu Viqueque tuur hamutuk kria konferénsia hodi hili estrutura iha munisípiu refere.

“Ami hasoru malu ho desteradu sira hodi kria estrutura, maibé mosu Covid-19 susar atu hasoru malu. Ohin hanesan oportudade bele hasoru malu hodi realiza konferénsia,” nia katak.

Nia fó-sai katak, atividade konferénsia ne’e hetan apoia orsamentu husi nasionál ho montante rihun atus-neen lima-nulu.

Entretantu partisipa iha konferénsia mai hosi postu administrativu lima, kongresista desterradu hamutun na’in-75, PNTL, reprezentante Konsellu Veteranu Nasionál no reprezentante Gabinete Primeiru-Ministru asuntu Sosiedade Sivíl.

Jornalista         : Vitorino Lopes da Costa
Edítór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here