Ministru Asuntu Kombatente Libertasaun Nasionál, Júlio Sarmento da Costa "Meta Mali". Imajen/Egas Cristovão.

COVALIMA, 20  novembru 2021 (TATOLI) – Ministru Asuntu Kombatente Libertasaun Nasionál (MAKLN), Júlio Sarmento da Costa ‘Meta Mali’ no Xefe Estadu Maiór F-FDTL, Brigadeiru Jenerál, Calisto dos Santos ‘Coliati’, husu joven sira tenke unidade nune’e kria ambiente pás no estabilidade iha sosiedade.

“Ita ultrapasa situasaun ida-ne’ebè difisil durante tinan 24 no ita unidade tebes, ita kontrola joven sira, maibé ohin vetetanu sira la kontrola oan, tanba ne’e joven sira tenke kontribui ba pás no estabilidade iha sosiedade” Governante ne’e fó hanoin ne’e bainhira partisipa serimónia fúnebre Saudozo Sesurai, iha aldeia Tabaco Klot, suku Debos, sesta ne’e. 

Nune’e mós nia konvida vetetanu sira tenke hamutuk atu sai forsa no iha unidade ida tanba unidade maka bele fó  solusaun ba buat hotu.

Meta Malik, aproveita oportunidade ne’e fó hanoin ba saudozu  Sesurai nia oan sira tenke eskola tanba estadu sei tau-matan. 

“Ha’u atu hatete ba família Saudozo nia oan tenke eskola tanba sei kontrola hosi Estadu nune’e sei iha tán valor ruma ba aban bainrua nian,” Meta Mali fó hanoin. 

Entretantu, Xefe Estadu Maiór F-FDTL, Brigadeiru Jenerál Calisto dos Santos ‘Coliati’,  hateten, atu kontroi rai ida-ne’e presiza unidade la’ós ho rama-ambon. 

Xefe Estadu Maior FALINTIL-Forsa Defeza Timor-Leste (F-FDTL), Brigadeiru Jenerál, Calisto Santos “Coliati”. Imajen Tatoli/Eugénio Pereira.

“Saudozu sira la’ós rai rama-ambon ba ita atu tuku-malu, oho-malu, sira rai ba ita atu hadomi malu, ita-nia rain kontribui ba pás no estabilidade. Ita-nia polítiku sira bele hala’o planu atu halo dezenvolvimentu atu fó resposta ita-nia funu, ita-nia independénsia ne’ebè ita konkista ho ita-nia barani no terus, independénsia ida-ne’e ita tenke prienxe ho buat ne’ebè pozitivu ,” nia hatutan. 

“Atu konstroi rai ida-ne’e, presiza ita hotu nia unidade hodi fó liman ba malu, labele hatudu liman ba malu beibeik. Ita-nia saudozu sira fó sira-nia vida la haree ba kór. Tanba domin ba povu no ba rai ida-ne’e. Ita ne’ebé moris atu hatutan sira-nia misaun nune’e ita bele kontribui ba pás no estabilidade iha sosiedade,” nia tenik. 

Jornalsita         : Celestina Teles

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here