Manán FC Bimenikibo, FC São Francisco Oémolo sei hasoru FC Sarankeu iha 8 finál. Imajen Tatoli/Abílio Elo Nini.

OÉ-CUSSE, 20 novembru 2021 (TATOLI) — Ekipa hosi São Francisco Oémolo FC halakon ekipa jogadór FC Bimenikivo iha 16 finál Kopa Assosiasaun Futeból O’e-Cusse (AFO) sub-22 ho rezultadu 2-1, nune’e FC São Francisco Oémolo hakat ba 8 finál.

Jogu 16 finál ne’e realiza iha kampu Futeból Oébau, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA), sesta ne’e.

Jogu ne’e hahú iha primeira parte ho durasaun menutu 45 ne’e, dominante bola hosi FC São Francisco Oémolo, tanba to’o de’it menutu 36, jogadór Agustinho do Santos Sole, númeru kamizola 17 lansa golu dahuluk liuhosi penalidade tanba falta livre hosi FC Bimenikivo, nune’e hatuur rezultadu 1-0.

Ho rezultadu ne’e lori sorti di’ak ba ekipa FC São Francisco Oémolo tanba menutu 42, jogadór Adérito Lasi númeru kamizola 7 lansa-tán golu ida hodi muda rezultadu ba 2-0. Iha jogu primeira parte ho durasaun menutu 45 ne’e lidera provizóriu hosi FC São Francisco Oémolo ho rezultadu 2-0.

Hafoin deskansa, tama ba segunda parte durasaun tempu 45, ekipa FC Bimenikivo hahú hatudu estratéjia foun hodi troka jogadór. Ho estratéjia ne’e iha duni rezultadu tanba to’o de’it menutu 67, jogadór João de Deus Pauf númeru kamizola 8 lansa golu hodi muda rezultadu ba 1-2.

Nune’e, iha jogu segunda parte termina ho 90 menutu, FC São Francisco Oémolo lidera ho rezultadu 2-1, hodi hakat ba 8 finál sei hasoru FC Sarankeu iha 23 Novembru semana oin, hodi hadau tikete ba 4 finál.

Nune’e treinadór FC Bimenikivo, Camilo Saet, rekoñese ekipa lakon tanba jogadór sira ladún unidade serbisu hamutuk, nune’e afeta derrota iha 16 finál ne’e.

“Ami-nia ekipa lakon, tanba joga ladún unidu hodi serbisu hamutuk atu hetan nia rezultadu, maibé hanesan treinadór ami sei hadi’a fallansu ne’ebé ohin ami lakon, nune’e iha fururu sei joga di’akliu-tán,” nia katak.

Purtantu treinadór FC São Francisco Oémolo, Adelino Nono, agradese tanba ekipa jogadór sira hatudu jogu di’ak hodi ultrapasa 16 finál ba 8 finál.

“Ami sei hasoru ekipa FC Sarankeu iha semana oin, no ami-nia mehi hakarak hakat liu to’o 4 finál,” nia orgullu

Entretantu, jogu ho durasaun tempu menutu 90 ne’e lidera hosi árbitru Octaviano da Cruz, asistente dahuluk Benedito da Conceição, asistente daruak Joaquin Mota.

Jornalista         : Abílio Elo Nini
Editór               : Evaristo Soares Martins.

PUBLISIDADEiklan

HAKEREK NO HATÁN

Please enter your comment!
Please enter your name here