Kandidatu brigadista sira hein hela atu partisipa iha prova oral. Imajen Tatoli/Sérgio da Cruz.

BOBONARO,19 novembru 2021 (TATOLI)— Sekretariadu Tékniku Administrasaun Eleitorál (STAE) Munisípiu Bobonaro, sesta ne’e realiza teste orál ba kandidatu brigadista na’in-210 hosi suku 50 nune’e prepara ba eleisaun prezidensiál 2022.

Diretór STAE Munisípiu Bobonaro, Mariano Viegas Amaral, espika, kandidatu hirak-ne’e selesiona ba faze prova orál hafoin halakon konkorrente na’in-180 iha prova eskrita ne’ebé realiza iha fulan-kotuk.

“Rekrutamentu ida-ne’e konkorrente hamutuk 390 tuir ona prova eskrita iha fulan kotuk, na’in-210 mak pasa, agora ita fó prova orál ba sira. Siginifika hosi 210 ne’e ita presiza de’it na’in-130, depois sei serbisu ho STAE ba atividade eleisaun prezidensiál,” nia informa ba Agência TATOLI, iha Maliana.

STAE Munisípiu Bobonaro presiza de’it brigadista na’in-130, tanba totál sentru votasaun ne’ebé espalla iha suku 50 ne’ebé perténsia ba postu administrativu neen (6) hamutuk 130 nune’e destaka de’it brigadista ida.

Brigada hirak-ne’e bainhira STAE anunsiu rezultadu pasa iha rekrutamentu ne’e, sei destaka ba iha postu administrativu Atabae koloka brigada 13, Balibo 20, Bobonaro 40, Cailaco 15, Lolotoe 14 no postu administrativu Maliana 28.

“Sira-nia durasaun kontratu fulan-lima ka fulan-neen hanesan ne’e, aban-bainrua sei serbisu hamutuk ho STAE atu asegura materiál sensitivu sira iha ita-nia eleisaun prezidensiál tinan oin,” nia katak.

Entretantu konkorrente Octavio Paulo, kontente tanba bele hetan oportunidade kompete iha konkursu ne’e, atu kontribui nia kapasidade ba iha eleisaun prezidensiál.

“Ita mai tuir konkursu públiku signifika iha manán ka lakon, ba ha’u lakon mós normal. Sé manán agradese tanba ne’e ha’u fiar-aan mak mai tuir vaga ida-ne’e, sé la fiar-aan ha’u la-mai ida,” kandidatu brigadista ne’e argumenta.

Enkuantu hahú hosi janeiru to’o setembru 2021, STAE Bobonaro rejista eleitór foun hamutuk 2.097 no eleitór óbitu ne’ebé elimina ona hamutuk 862.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here