Diretor Servisu Saúde Munisípiu Bobonaro, João Barreto Cardoso. Imajen Tatoli/Sérgio da Cruz.

BOBONARO, 19 novembru 2021 (TATOLI) – Servisu Saúde Munisípiu Bobonaro implementa programa vasinasaun kontra COVID-19 ho modelu dor to dor ba komunidade iha munisípiu refere.

Diretor Servisu Saúde Munisípiu Bobonaro, João Barreto Cardoso, esplika daudaun ne’e pesoál saude sira implementa hela vasina ‘dor to dor’ ba komunidade sira iha suku 50, postu administrativu neen iha munisípiu Bobonaro ne’ebé seidauk simu vasina.

Razaun implementa programa ne’e tanba haree katak, dadus persentajen vasinasaun nasionál Bobonaro okupa terseiru lugár numeru kiikliu kompara ho munisípiu sira seluk.

“Ita-nia ekipa saúde sira la’o dor to dor ba iha aldeia hotu-hotu, ekipa balu mós halo atividade fiksu iha postu hanesan merkadu Maliana loke seksaun rua. Ne’e atu fasilita komunidade sira hetan vasina, atu nune’e ita bele hasa’e tán kobertura vasinasaun tanba ita-nia vasina nível munisípiu foin 68,5%,” nia informa ba Agência Tatoli, iha Maliana, sesta ne’e.

Diretór Saúde Munisípiu Bobonaro ne’e espera vasina tama-sai uma ne’e bele alkansa to’o 80% iha fulan -dezembru tinan 2021.

Enkuantu, dadaun ne’e Governu kontrata hela médiku no espesialista  na’in 10-resin destaka iha suku Lourba hodi fó vasinasaun no halo tratamentu saúde masal ba komunidade sira.

Entretantu, totál vasina tipu AstraZeneca viál 600-resin mak sei iha hela konjeladór sira iha sentru saude hotu iha Bobonaro. Hosi númeru ne’e balu sei expire iha loron 23 novembru semana oin no balu expire iha 30 novembru.

Nia dehan, bainhira vasina hirak-ne’e la oferese hotu ba komunidade sira entaun iha loron ikus pesoál saúde sira sei halo destruisaun.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here