Prezidente Komisaun Organizadora, Martinho Abani Elo atuál Sekretáriu Rejionál ba Asuntu Administrasaun. Imajen Tatoli/Abílio Elo Nini.

OÉ-CUSSE, 19 novembru 2021 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), deside modalidade desportiva haat hodi komemora loron Proklamasaun Independénsia Unilaterál 28 Novembru ba dala-46.

Modalidade desportiva haat ne’e hala’o iha sub-rejiaun Pante Makassar, Oésilo, Pássabe no Nítibe. Desportu komunitária modalidade haat ne’e komposta hosi Basketeból, Badminton, Taekwondo, marsa ba pás no futsál ba rejionál hitu.

“Ita komemora sei la konsentra iha rejiaun maibé komunidade sira sei selebra iha idak-idak nia sub-rejiaun. Ida-ne’e tanba relasiona ho atividade desportu komunitáriu sei realiza iha kada sub-rejiaun,” Prezidente Komisaun Organizadora 28 Novembru, Martinho Abani Elo, informa ba Agênsia Tatoli iha Numbei, Oé-Cusse, sesta ne’e.

Atuál Sekretáriu Rejionál ba Asuntu Administrasaun ne’e katak, atividade desportu komunitária ne’e apoia hosi Sekretaria Estadu Juventude no Desportu (SEJD) ho objetivu promove desportu hahú hosi baze.

“Iha 28 Novembru dadeer ita selebra loron istóriku ne’e, lokraik antes hatún bendeira, ita kontinua abertura kedas ho atividade desportu komunitária, ohin komunidade iha kada sub-rejiaun hahú forma ona komisaun ba atividade ne’e,” nia katak.

Finansiamentu ba atividade desportu komunitáriu ne’e ho montante rihun $19-resin no finansiamentu ba desportu eskolár rihun $15-resin, ne’e apoiu mai hosi Sekretariádu Estadu Juventude no Desportu (SEJD). Nune’e finansiamentu ba selebrasaun loron Proklamasaun Unilaterál 28 Novembru ba tinan ne’e, autoridade RAEOA aloka rihun $29 ba sub-rejiaun Oésilo, Pássabe, Nítibe no Pante Makassar.

Preparasaun ekipa hasa’e bandeira atinje 75%

Progresu preparasaun hosi ekipa konjunta ba komemorasaun hosi grupu hasa’e Bandeira nasionál iha Rejiaun Administrativa Espesiál Oé-Cusse Ambeno (RAEOA), daudaun ne’e atinje ona 75%. 

Preparasaun ekipa konjunta ba komemorasaun 28 Novembru iha RAEOA atinje 75%. Imajen Tatoli/Abílio Elo Nini.

Formasaun preparasaun ne’e, fahe ba sesaun drumband, marka pasu no grupu hasa’e bandera, ne’ebé realiza hahú iha segunda 15 novembru, dirije hosi Komandante Operasaun PNTL RAEOA, kapitaun Bernardo Freitas, hodi envolve estudante hamutuk 42 inklui membru PNTL no F-FDTL.

“Ohin, ita ajusta serbisu formasaun hosi estudante, PNTL no F-FDTL, ne’ebé ba ami-nia preparasaun iha loron haat preparasaun provizóriu atinje ona 75%,” Komandante Operasaun, kapitaun Bernardo Freitas informa.

Treinadór João Baptista Neno, hanesan eis korpu hasa’e bandeira nasionál, agradese hodi fahe esperiénsia ba estudante sira, kona-ba oinsá sai dirijente iha loron komemorasaun loron istóriku ne’e.

“Ami hanesan eis Korpu Hasa’e Bandeira Nasionál (CIBN, sigla portugés) 2014 nian, kada tinan ami mak origaniza fó treina, ami agradese tanba buat ne’ebé ami hetan ona iha nasionál, bele habelar ba estudante sira, nune’e matéria orden unida ne’e labele para iha-ne’e maibé tenke fó tutan ba nafatin,” nia katak.

Nune’e estudante, Apolónia Misa Kebo, hosi Eskola Tékniku Vokasionál Lifau, orgullu hodi ativu iha formasaun orden unida hodi komemora 28 Novembru 2021.

“Ha’u agradese ba oportunidade ne’e, maski ami seidauk akapta maioria maibé oportunidade di’ak mai ami hodi aprende, tanba ami seidauk hetan prátika, nune’e liuhosi biban ne’e ami bele aprende ona oinsá sai dirijente hodi komemora ita-nia loron istóriku iha 28 Novembru,” nia hateten.

Entretantu, totál partisipante iha CIBN ba komemorasaun 28 Novembru iha RAEOA hamutuk estudante na’in-42, komposta hosi Eskola Sekundáriu Jerál Palaban na’in-10, Eskola Tékniku Vokasionál Palaban na’in-10, Eskola Tékniku Vokasionál Lifau na’in-11 no Eskola Tékniku Agrikultura Oé-Cusse 10.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here