AIFAESA, I.P, hala'o enkontru kortéjia ho Sekretáriu ba Asuntu Komérsiu no Indústria, hodi diskuti futuru kooperaaaun ba atividade inspesaun. Imajen/mídia Sekretaria Komérsiu no Industria RAEOA.

OÉ-CUSSE, 19 novembru 2021 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), kinta ne’e realiza enkontru kortéjia ho Autoridade Inspesaun no Fiskalizasaun, Atividade Ekonomia Sanitária no Alimentár, Institutu Públiku (AIFAESA,I.P) hodi diskute futura kooperasaun ba kontrolu nesesidade bázika iha loja, kioske no merkadu.

“Prezensa inspetór jerál AIFAESA ne’e diskute kooperasaun iha futuru, tanba iha tinan kotuk koordenadór anteriór AIFAESA fó kompeténsia ba parte komérsiu hala’o atividade inspesaun iha Oé-Cusse,” Sekretáriu Rejionál ba Asuntu Komérsiu no Indústria, Pedro da Silva Boquifai, informa ba Agência Tatoli iha Palaban, Oé-Cusse, sesta ne’e.

Nia fó sai katak, kompeténsia autoridade tanba tuir lei númeru 3/2014 (kriasaun RAEOA) sita, RAEOA sai nu’udar autónomu ba administrasaun no finanseira, tanba ne’e prezensa AIFESA ko’alia kona-ba futuru kooperasaun iha atividade inspesaun iha Oé-Cusse.

“Agora daudaun ne’e, AIFAESA entrega ona ezbosu kona-ba Nota Entendimentu ba komérsiu, entaun ha’u sei hato’o ba Prezidente Autoridade, nune’e jurídiku sira bele haree, nune’e iha futuru ita bele realiza ona nota entendimentu ba asuntu inspesaun nian,” nia katak.

Durante ne’e Diresaun Komérsiu no Industria realiza ona atividade inspesaun liuhosi despaxu hosi Prezidente Autoridade, orienta atu kontrola sasán nesesidade bázika liu prazu iha loja, kioske no merkadu.

Inspetór Jerál AIFAESA, I.P, Ernesto Monteiro, informa, objetivu vizita Oé-Cusse diskuti asuntu kooperasaun, nune’e bele kontrola sasán nesesidade bázika iha rejiaun refere.

“Ami-nia prezensa mai Oé-Cusse, atu diskute asuntu inspesaun nune’e iha posibilidade futuru bele halo Nota Entendimentu tanba Díli ho Oé-Cusse distánsia dook. Vizita ne’e mós entrega dokumentu ba autoridade kona-ba asuntu Nota Entendimentu nian, atu haree no analiza ba faze implementasaun,” nia katak.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here