Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 18 novembru 2021 (TATOLI) – Polísia Nasionál Timor-Leste (PNTL) komandu munisípiu Bobonaro, lideradu Superintendente Antoninho Mauluta, prepara planu operasaun asegura estabilidade durante komemorasaun loron Proklamasaun Independénsia 28 Novembru ba dala-46.

“Ita sei halo seguransa másimu iha komemorasaun 28 Novembru, oras ne’e daudaun ita prepara ona planu operasaun distribui hotu ona ba eskuadra sira sei aprezenta fali ba komandu jerál,” Superintendente Antoninho Mauluta, informa ba jornalista sira, iha kna’ar-fatin, kinta ne’e.

Mauluta afirma, daudaun ne’e kamandu PNTL Bobonaro koordena ho Batallaun Orden Públika (BOP, sigla portugés), Komandu Operasaun Espesiál (COE, sigla portugés) no FALINTIL-Forsa Defeza Timor-Leste (F-FDTL) postu Tunubibi, hodi halo vijilánsia iha fatin komemorasaun sira iha munisípiu no postu administrativu sira, hodi garante serimónia loron istóriku ne’e la’o ho ambiente hakmatek.

Nia dehan, komandu mós sei la tolera joven ka kualkér grupu sira-ne’ebé hakarak impede atividade desportu komunitária no kria instablidade iha fatin serimónia sira-ne’e realiza iha fatin hotu iha Bobonaro.

“Bainhira ita-nia mmembru sira identifika sidadaun sira hakarak perturba ita-nia serimónia nasionál, ita sei atua, lori mai prosesa tuir ita-nia lei ne’ebé iha, tanba ita konsidera instituisaun mak bootliu duké grupu sira,” nia subliña.

Enkuantu kona-ba preparasaun komandu nian ba iha selebrasaun 28 Novembru ne’ebé agora la’o hela mak, membru na’in-lima komposta hosi komando na’in-tolu no BOP na’in-rua halo hela formasaun formatura parada orden unida ba estudante na’in-114 iha kampu Futeból Maliana durante semana rua.

“Formatura ida ho letra, iha letra 28 iha letra 11 no iha letra 75, ida-ne’e agora la’o hela ha’u rasik mak halo kontrola atu haree bainhira nia tama formatura karik seksaun 11 oinsá atu lori Bandeira tama ba hasa’e, ida-ne’e mak ita prepara hela,” nia informa.

Nune’e mós komandu PNTL Bobonaro prepara atu prodús sertifikadu apresisaun ba estudante hirak-ne’e, hodi halo atribuisaun ba iha 28 Novembru hodi valoriza sira-nia kontribuisaun ba komemorasaun loron istóriku ne’e.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here