Primeiru Ministru, Taur Matan Ruak, fó posse ba Prezidenti Komisaun Terras, Pascoal da Costa Soares. Iha salau Palasiu Governu, sexta (19/11). Imajen Tatoli/Francisco Sony

DILI, 19 novembru 2021(TATOLI)— Primeiru Ministru, Taur Matan Ruak, fó pose ba membru Komisaun Terras no Propriedade nain-11, ne’ebé atu presta serbisu ka rezolve disputa bens no imóvel iha Timor-Leste.

Iha biban ne’e, PM Taur, hateten, membru Komisaun Terras no Propriedade nia funsaun prinsipál maka atu halo rekoñesimentu atribuisaun ba direitu dahuluk kona-ba propriadade imóvel sira ne’ebé hetan disputa.

Notísia relevante: SETP sei estabelese komisaun terras rezolve disputa rai

“Leí fó dalan ba imi atu halo apresiasaun no foti desizaun kona-ba kazu sira ne’ebé iha disputa liuliu kona-ba direitu propriedade sira nian ba bens no imóvel,” PM Taur, hateten, iha ámbitu seremonia pose, iha Salaun Ministériu Prezidensiál Konsellu Ministru, Palásiu Governu, sesta ne’e.

Xefe Governu esplika komisaun ne’e hanesan organizmu ne’ebé resposavel ba rezolusaun kazu disputa sira kona-ba bens no imóvel, nune’e husu ba Komisáriu ho nian estrutura tomak atu hatudu serbisu ho profisionál.

“Poder sira ne’e la’ós direitu ida ne’ebé atribui ba imi, maibé importante liu, podér ida ne’e nuudar responsablidade ida ba ita bo’ot sira, iha ne’ebé ita bo’ot sira tenke hala’o ho laran no étika profisionàl ne’ebé aas,”Xefe Governu ne’e enkoraja.

Líder Ezekutivu ne’e husu liután atu Komisaun Terra Propriadade tane aas imparsialidade, integridade kompetensia kompromisu no responsablidade, nune’e hotu-hotu iha assun no aktu  ida de’it ba rezolve disputa sira.

Iha biban hanesan, Ministru Jutisa, Manuel Cárceres da Costa, hateten, kria Komisaun Terras no Proriedade ne’e ho kompetensia nuudar organizaun ne’ebé tuir lei atu rezolve kazu haksesuk malu kona-ba bens no imovél ou atu halo apresiasaun ba kazu  disputa sira iha ámbitu ba prosesu rekoñesimentu no atribuisaun direitu ba titularidade rai.

“Natureza komisaun ida ne’e nuudar karatéristika prinsipàl maka independensia no responsablidade katak komisaun ho nia membru sira atu ho independente, signifika bainhira hala’o kompeténsia sira ne’ebé leí atribui ba sira, labele husu nein simu instrusaun hosi Governu ka hosi kualker entidade públika no privadu,” Governante ne’e akresenta..

Entretantu, Prezidente Komisaun Terras no Propriedade, Pascoal da Costa Soares, afirma, servisu ne’ebé atribui ba Komisaun ne’e todan,  maibé kompromete atu asume ho responsablidade.

Prezidenti Komisaun Terras, Pascoal da Costa Soares. Imajen Tatoli/Francisco Sony

“Ami nian servisu todan tebes, maibé ami sei hahú foku uluk rejimentu internu tanba mata-dalan atu ami serbisu tuir painél arbitrajen oinsá atu distribui kazu sira ba Komisáriu sira liuliu ba kazu disputa sira,” nia garante.

Nune’e, Nia kompromete sei hamutuk ho membru sira serbisu ho imparsiál, profisionál no independente tuir dekretu-lei númeru 13//2017, kona-ba rejime jurídiku, ba definisaun titularidade bens no imovél, ne’ebé iha artigu 55 no 56 fó kompetensia ba Komisaun ne’e atu rezolve kazu disputa sira.

“Ami sei la haree ba sé no ba individu, maibé ami serbisu ho baze ba lei ho matenek hodi rezolve kazu desputa sira. Ami prontu simu responsablidade ida ne’e hodi rezolve kazu disputa sira,” nia akresenta.

Notísia relevante: MJ-MF kria rejime remuneratóriu ba membru Komisaun Terra no Propriedade

Jornalista : Natalino Costa

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here