Jogador kontrola hela bola bainhira joga kontra STRELA BAGIA FC iha Pra liga Futsal Timor Leste 2020-2021 iha kampu Fatuhada, kuarta 18/11/2021..Imajen Tatoli/Antonio Goncalves

DILI, 20 novembru 2021 (TATOLI)– Jornada Pra Liga Futsal Timor -Leste daudaun ne’e besik atu ramata ona ekipa balu termina ona sira nia jornada no ekipa balun seidauk termina hela jogu ikus. Iha ne’ebé hasoru malu ikus entre ekipa Mushila FC kontra Coelho FC hanesan fator determinante ba Coelho bele utrapasa ba primeira divizaun bainhira manan Mushila.

Maibé, iha rezultadu jogu Coelho laiha forsa ne’ebé adekuadu atu mánan Mushila ikus mai ekipa ne’e tenke mantein nia pozisaun iha segunda divizaun ho pontu 33 iha liña 11.

Tanba ekipa ne’e mánan Mushila tebe sai kedan Jerman FC ne’ebé tuur iha lina ikus liu primeira divizaun nian ho pontu 34, maibé la konsege no Jerman firme iha nia pozisaun hodi hetan tikete ba primeira divizaun époka 2022.

Bainhira jogu hahú iha kampu futsal FALINTIL-Forsa Defeza Timor -Leste (F-FDTL), Fatuhada, Dili, sesta kalan ne’e, ekipa rua hatudu jogu tuir tékniku no abilidade ho objetivu atu hetan vitória.

Mushila joga ho kalma tan iha ona zona modok ne’ebé okupa iha pozisaun segundu lugar, enkuantu Coelho jogu hakas an atu hatama golu, maibé jogadór Mushila nian la fó fatin.

Jogu sai manas liután ba ekipa rua,  nune’e iha minutu 15 jogadór Mushila João Paulo lansa kedan golu primeiru hodi hatur rezultadu ba 1-0. Nune’e iha minutu 16 jogadór, Rui Martins halo tan golu ida muda rezultadu skore ba 2-0.

Coelho la nonok de’it hala’o jogu hodi esforsu an nune’e bele halo netik golu ruma, esforsu hirak ne’e la hela de’it hanesan esforsu nune’e iha minutu 18, jogadór Frangenio Memo lansa golu ida hodi muda rezultadu ba 2-1.

Golu ne’e mak hanesan golu ikus iha minut primeira parte tanba laiha tan ekipa ida mak halo golu.

Hakur ba segunda parte ekipa rua nafatin hatudu jogu, Coelho ho ambisaun ne’ebé makas atu hatama golu, nune’e iha minutu 23 Gilman Carvalho lansa golu ida hodi hatur rezultadu ba 2-2, ho golu ne’e halo Coelho nia ritmu jogu komesa sa’e makas hodi kontra no atake atu mánan Mushila.

Maibé,  Mushila mantein iha nia pozisaun hodi halo defensive makas ikus mai Colho la halo tan golu ruma no Mushila nia jogadór Eufrasio hodi fó Vitoria ba Mushila ho rezultadu 3-2 no laiha tan golu ruma mak akontese to’o minute termina.

Ho Vitória ne’e lori ekipa Mushila hela iha pozisaun segundu lugar ho pontu 58 enkuantu primeiru lugar mantein ho Ramelau ho pontu 61 hela de’it jornada ida termina jogu hodi deside Ramelau sai kampiaun ba Pra Liga Futsal Timor -Leste.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here