Serimónia fúnebre Saudozu Álvaro Do Nacimento ‘Sesurai’ hodi haloot iha saudozu nia uma oin, aldeia Tabaco Klot, suku Debos, postu administrativu Suai Vila, munisípiu Covalima. Imajen Tatoli/Celestina Teles.

COVALIMA, 19 novembru 2021 (TATOLI)—Ministru Kombatente Libertasaun Nasionál (MAKLN) Júlio da Costa ‘Meta Malik’ no Xefe Estadu Maiór F-FDTL Brigadeiru Jenerál Calisto dos Santos ‘Coliati’, partisipa serimonia fúnebre Saudozu Álvaro Do Nacimento ‘Sesurai’ hodi haloot iha saudozu nia uma oin, aldeia Tabaco  Klot,  suku Debos, postu administrativu Suai Vila, munisípiuu Covalima.

Notísia Relevante: “Saudozu ‘Sesurai’ brani iha luta ba ukun rasik an”

Molok haloot, lori Saudozu Álvaro do Nascimento Sesurai nia mate-isin ba vizita sede Konsellu Veteranu Munisípiu Covalima, hafoin lori mai iha igreja Ave Maria Suai hodi halo misa requiem, no Reprezentante Prezidente Konsello Veteranu no Kombatente Libertasaun Nasionál, Tonije Lee, halo leitura votu pezár hosi Prezidente Repúblika, Francisco Guterres Lú-Olo.

Ministru Kombatente Libertasaun Nasionál (MAKLN), Júlio da Costa ‘Meta Malik’, hateten Saudozo ohin haloot nia iha uma oin maibe ida ne’e responsabilidade nafatin Governu nian.

“Saudozo haloot iha nia uma oin hanesan provizóriu de’it, tanba sei hasai nia tau iha fatin ida-ne’ebè ema veteranu sira merese atu haloot bá,” Meta Malik hateten liuhosi nia diskursu bainhara partisipa iha serimónia fúnebre Saudozo ‘Sesurai’, sesta ne’e.

Saudozu ‘Sesurai’ ba haloot iha Jardim dos Herois da Patria Metinaro, Dili, maibé ninia família sira ho susar tebes atu ba vizita.

Maske haloot ona iha nia iha uma oin maibe Estadu nafatin iha responsabilidade, nune’e Estadu sei koloka iha loron ikus mai.

“Ha’u hato’o ha’u- nia sentimentu profundu no triste, ita mai Suai, úniku saudozu Sesurai nia ema ne’ebè simples. ha’u fó ha’u-nia omenajen ikus, Adeus Sesurai,” Meta Malik ko’alia ho matan-been.

Xefe Estadu Maiór F-FDTL, Brigadeiru Jenerál, Calisto dos Santos ‘Coliati’, lori família ho veteranu sub Rejiaun IV nia naran tomak hato’o sentidu kondolénsia ba Saudozu Álvaro do Nascimento Sesurai nia família enlutada.

“Ita-nia saudozu iha nia moris nu’udar joven nia oferese nia vida ba iha prosesu ukun rasik aan. Nia nu’udar ezemplu ba ita-nia jerasaun foun sira no nia domin ba rai no povu Timor-Leste labele sukat. Saudozu husik hela Covalima ho istória la’ós ho mamuk de’it,” nia dehan.

Iha serimonia fúnebre ne’e, partisipa hosi Ministru Asuntu Kombatente Libertasaun Nasionál (MAKLN), Júlio da Costa ‘Meta Malik’, Xefe Estadu Maiór F-FDTL, Brigadeiru Jenerál, Calisto dos Santos ‘Coliati’, Deputadu partidu demokratiku Adriano do Nascimento, Veteranu Aquilino Guterres Ete Uku ho nia espoza, Veteranu Zona 7, povu Covalima tomak.

Jornalsita : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here