Vítima António Soares hela iha hadak uma-lisan nia-laran, iha suku Uma-kiik Viqueque, sesta (19/11). Imajen TATOLI/Vitorino Lopes da Costa

VIQUEQUE, 19 novembru 2021 (TATOLI)–Kazu taa-malu akontese iha fatin Horok-oan, suku Uma-kiik, postu Viqueque, munisípiu Viqueque, iha sesta ne’e maizumenus tuku 09:00 dadeer, ne’ebé suspeitu Carlito Soares Guterres ho idade 38, taa vítima António Soares ho idade 50, iha uma-lisan laran no mate iha fatin.

Tuir Xefe Polísia Investigasaun Eskuadra Viqueque villa, José Pinto Fernandes, parte Polísia la hatene akontesementu ne’e, ne’ebé Xefe aldeia Afuu ho naran Francisco Pinto, mai informa iha Eskuadra Polísia Nasionál Timor-Leste (PNTL) postu Viqueque, nune’e Komadante Eskuadra organiza membru no envolve ekipa investigasaun ba fatin akontesimentu.

“Hafoin ami to’o iha fatin akontesimentu, ami la haree, entaun ami ba suspeitu ninia fatin no nia ko’alia ho ami, ne’ebé konsege entrevista suspeitu no ami husu to’o dala-lima, kona-ba kanek ne’ebé nia iha sé mak sona? suspeitu hatan katak nia rasik mak sona, maibé hafoin ami haree ba suspeitu nia kondisaun komesa grave, ami la husu tan,” Xefe Polísia informa ba Agência TATOLI, iha eskuadra PNTL Viqueque villa, sesta ne’e.

Aleinde ne’e, parte Polísia kontaktu ona ba ambulánsia hodi evakua suspeitu bá ospitál, maibé to’o dalan klaran suspeitu mós hakotu iis.

Xefe Polísia esplika, kronolojia kazu taa-malu ne’ebé haktuir hosi sasin Afonso Gomes, hanesan aman hosi vítima, katak horiseik sira ba to’os hodi kuda batar no lorokraik nia fila mai haree sira-nia surik uma-lisan laiha ona (lakon), entaun dadeer António Soares ho nia aman ba ko’a tua hodi fa’an iha estrada-ibun, ne’ebé ema sosa hotu.

“Nune’e sasin fó hatene ba nia oan katak surik uma-lisan lakon, ne’ebé sira ba haree. To’o iha uma-lisan, sira na’in-rua loke odamatan atu tama uma-laran, aman mak tama uluk, hafoin oan tama ikus, maibé derepente suspeitu subar iha uma kakuluk no haksoit tun ba vítima hodi sona kedas to’o monu. Nune’e, vítima ninia aman sente trauma no halai sai kedas hosi uma-laran ba subar,” José Pinto haktuir.

Nune’e, Polísia Investigasaun Eskuadra Viqueque villa ba fatin akontesimentu no hamutuk ho komunidade lokál hodi haree kondisaun.

“Ha’u rasik tama ba uma-laran no haree vítima António Soares mate iha fatin. Ha’u identifika vítima ne’e kanek ida iha ninia fuan, kanek ida fali iha sorin loos no kanek ida iha ninia kabun,” nia konta tuir.

Ba kestaun ne’e, família vítima sira deklara katak lakoi halo prosesu autópsia no husu mate-isin entrega ba familia hodi halo prosesu funebre iha uma-lisan.

“Ami husu ba família sira atu ko’alia tuir malu didi’ak tanba na’in-rua ne’ebé mate ona ne’e hanesan família hotu,” Xefe Polísia dehan.

Iha sorin seluk, Doutór Alzason Soares Maia, haktuir, pasiente ne’ebé nia tau-matan ka suspeitu, ohin evakua iha fatin akontesementu ba ospitál internamentu Viqueque maizumenus tuku 11:30 dadeer, maibé to’o ospitál, iis laiha ona.

“Pasiente to’o mai no hatun hosi ambulánsia, médiku sira fó duni atendimentu iha sala emerjénsia. Ami koko pasiente maibé laiha hotu, entaun ami haree ninia kanek fatin, tuir informasaun katak pasiente rasik maka sona ninia-an, kanek fatin ida iha fuan 8cm no parte li’ur 4cm tama to’o pulmaun. Ami haree pasiente iis laiha, ne’ebé ami muda ba mortuáriu ona,” nia konta tuir.

Tuir observasaun Agência TATOLI iha terrenu, vítima latan hela iha hadak uma-lisan nia-laran ho kondisaun mate fatin.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here