Diretór Ezekutivu Sentru Formasaun Fundasaun Hadomi Timor, Abrão Monteiro. Imajen Tatoli/Nelia Fernandes.

DILI, 19 novembru 2021 (TATOLI)—Fundasaun Hadomi Timor, domingu (21/11) ne’e sei fó formasaun Blog Edukasaun ho tema “Promove no hariku konteudu lokál liuhosi plataforma online blogspot” ba joven 25.

Notísia Relevante:  Telemor sei kria Sistema E-Learning ba Fundasaun Hadomi Timor

Diretór Ezekutivu Fundasaun Hadomi Timor, Abrão Monteiro, hateten objetivu hosi formasaun ne’e atu kria ekipa ida at sira bele habelar no hariku konteudu lokál Timor-Leste nian, hodi bele tulun estudante no sidadaun sira bele fasil buka referénsia iha plataforma online.

“Duurante ne’e ami akonpaña katak iha Timor-Leste ita-nia konteudu lokál iha internet ne’e menus tebe-tebes. Entaun, ami fundasaun haree katak presiza utiliza plataforma sira-ne’ebé agora dauudauk iha ona, hanesan blogspot atu bele fó koñesimentu ba ami ekipa internál Fundasaun Hadomi Timor, hodi uza hanesan plataforma hodi hariku no habelar konteudu Lokál Timor-Leste nian ba mundu,” Abrão Monteiro hateten ba Agência Tatoli, iha nia kna’ar-fatin, Faról, Dili, sesta ne’e.

Ida-ne’e hanesan referénsia ba iha matéria informátika ka iha matéria ekonomia, polítika nomós ba saúde nian atu akumula matéria sira-ne’e, hodi tau iha plataforma ida de’it atu estudante no sidadaun sira bele asesu mais fasil.

“Durante ne’e ita hatene, ita-nia estudante no ita-nia ema sira bainhira atu buka referénsia ruma sira depende de’it ba iha konten hi lian Indonézia no konten malae sira-nian ho lían portugués, inglés. Ita-nia konten ne’e menus, tanba ne’e mak Fundasaun Hadomi Timor realiza formasaun ida-ne’e, atu fó kapasitasaun ba ami-nia ekipa rasik hanesan IT Smart Academy no Event Organizer Hadomi Timor, atu sira bele hatene oinsá atu kria blogspot no oinsá atu tau matéria konten lokál iha blogspot,” nia dehan.

Iha formasaun ne’e, formandu sira sei aprende oinsá atu kria blogspot, oinsá atu bele dezeñu blogspot no oinsá bele halo servisu ho ema matéria na’in sira, atu bele tau iha blogspot ne’ebé Fundasaun Hadomi Timor kria.

Entretantu, formasaun ne’e hala’o durante loron ida ho partisipante hamutuk 25, ne’ebé mai hosi ekipa IT Smart Academy no Event Organizer Hadomi Timor. Ema sira-ne’e kompostu hosi estudante universidade iha Dili laran, alumni, formandu no funsionáriu hosi Fundasaun Hadomi Timor.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here