FC Becune halakon FC Kalma 3-2 iha 16 finál Kopa AFO. Imajen Tatoli/Abílio Elo Nini.

OÉ-CUSSE, 18 novembru 2021 (TATOLI) – Ekipa hosi FC Becune ‘tebe-sai’ ekipa jogadór sira hosi FC Kalma iha 16 finál Kopa Assosiasaun Futeból Oé-Cusse (AFO) sub-22 ho rezultadu 3-2.

Iha jogu 16 finál ne’e realiza iha ka tmpu Futeból Oébau, suku Costa, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA), kinta ne’e FC Becune lidera provizóriu hakat ba 8 finál, hodi hein ekipa FC Jogus hasoru FC São Francisco Oémolo sei joga iha sabádu semana ne’e.

Jogu ne’e hahú iha primeira parte ho durasaun menutu 45, FC Becune la fó fatin ba ekipa jogadór FC Kalma, tanba foin jogu hahú to’o de’it menutu 4, jogadór FC Becune lansa golu ida, liuhosi jogadór Erquino Falo númeru kamizola 10, hodi hatuur rezultadu 1-0. 

Ho rezultadu ne’e, halo ekipa FC Kalma hahú esforsu maka’as to’o menutu 18 lansa golu ida liuhosi jogadór Leandro Tani ho númeru kamizola 7, hodi muda rezultadu ba 1-1.

Tanba rezultadu 1-1 ne’e hatudu forsa hanesan, maka ekipa FC Becune hasa’e tán tensidade to’o lansa golu ida iha minutu 41, liuhosi jogadór Rogério de Jesus Sousa ho númeru 12, nune’e jogu primeira parte lidera provizóriu hosi ekipa FC Becune ho rezultadu 2-1.

Hakat fali ba segunda parte, tanba rezultadu provizóriu FC Becune lidera, nune’e ekipa jogadór sira hahú hatudu vontade. To’o menutu 47 jogadór FC Becune lansa golu, liuhosi jogadór Erquino Falo númeru kamizola 10, hodi muda rezultadu ba 3-1.

Nune’e ekipa rua hahú hatudu joga maka’as liután no ekipa FC Kalma lansa golu, liuhosi jogadór Leandro Tani númeru kamizola 11, hodi muda rezultadu 2-3. Jogu segunda parte to’o menutu 90 iha 16 finál, FC Becune lidera ho rezultadu 3-2, nune’e ofisialmente hakat ba 8 finál.

Treinadór FC Kalma, Delfino Sole, rekoñese frakeza ekipa FC Kalma, lakon tanba jogadór sira ladún domina kampu, nune’e fó oportunidade ba ekipa FC Becune.

“Nu’udar treinadór ha’u sente orgullu tanba jogu iha manán no iha lakon, agora ami lakon ne’e tanba ami-nia jogadór sira lakon iha estamina halai to’o forsa laiha, ida-ne’e mak ami frakeza depois ladún domina kampu, maibé ba oin ami sei hadi’a frakeza ne’e,” nia katak.

Purtantu, treinadór FC Becune, Domisiliano Koi, agradese ba oportunidade ne’e maibé esforsu hodi hadi’a frakeza balun, nune’e tama iha 8 finál sei hatudu jogu ho kualidade.

“Ami-nia ekipa manán, maibé ida-ne’e la’o maioria jogadór sira joga di’ak ona, ha’u nu’udar treinadór ha’u observa iha frakeza balu presiza hadi’a, tanba ami sei hakat-tán ba 8 finál,” nia orgullu.

Entretantu, jogu ho durasaun menutu 90 ne’e lidera hosi árbitru Armandino dos Santos, asistente, dahuluk Benedito da Conceição no asistente daruak Candido da Costa.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here