Prezidente Autoridade Nasionál Komunikasaun (ANC-Sigla Portugés), João Olívio Freitas, entrega relatóriu rejistrasaun operadór telekomunkasaun CESLINK,S.A, ba Ministru Trasporte no Komunikasaun, José Agostinho da Silva. Iha salaun MTK, tersa (16/11). Imajen Tatoli/Francisco Sony

DILI, 18 novembru 2021 (TATOLI)- Advogada privadu kompañia OKA D’TEL, Adelina Meluk de Jesus Lobo, informa, tempu badak hato’o karta reklamasaun daruak ba Autoridade Nasionál Komunikasaun (ANC, sigla Portugés) hasoru empreza Ceslink tanba komete irregularidade hodi  fó prejuizu ba sira.

“Ami nian reklamasaun dahuluk rejeita ona, maibé ami sei hato’o reklamasaun daruak ho objetivu atu husu ANC hasai sertifikasaun rejistu ba Ceslink. Tanba Ceslink komete hela irregularidade hodi fó prejuizu makas no promete devolve ami nia sasan ho prazu fulan-tolu to’o neen, maibé la akontese. Nune’e ami hato’o keixa ona ba parte relevante-sira no kazu ne’e rasik submete ona ba tribunál,” Advogadu Privadu hosi Kompañia OKA D’TEL, hateten ba Agência TATOLI, iha knaar fatin, kinta ne’e.

Ministériu Transporte no Komunikasaun (MTK) liuhosi Autoridade Nasionál Komunikasaun (ANC, sigla Portugés), atribui sertifikadu rejistu ba empreza Ceslink tanba kompleta ona rekezitu-sira tuir dekretu-lei númeru 15/2012 hosi artigu 30, katak empreza halo   rejistrasaun, iha estatutu no kapasidade administrasaun, tékniku no finaseiru.

Nune’e, Advogada privadu ne’e afirma, submete karta reklamasaun atu ANC trava atribuisaun sertifikadu rejistu  tanba iha disputa, maibé  ANC rejeita hodi deside halo atribuisaun.

“Ami husu ba ANC atu trava lai atribuisaun sertifikadu rejistu ba empreza Ceslik tanba iha hela disputa laran, maibé ANC rejeita reklamasaun tanba konsidera desizaun tribunál buat ketak,” nia lamenta.

Hatan ba kestaun ne’e,  Prezidente Autoridade Nasionál Komunikasaun (ANC, sigla Portugés), João Olivio Freitas, hateten, rejeita reklamasaun hosi empreza Oka D’ TEL hasoru Ceslink tanba laiha baze fundamentu.

“Ita simu reklamasaun hosi Oka D’TEL no ami halo analiza klean hosi parte legál, hafoin Konsellu Administrasaun ANC deside hodi rejeita reklamasaun ne’e, tanba prova sira ne’ebé mak hato’o mai la tuir baze legál,” Prezidente ANC ne’e akresenta.

Maski, nia dehan rejeita ona, maibé ANC hein nafatin reklamasaun hosi parte empreza Oka D’TEL ba daruak.

“Ita atribui ona sertifikadu rejistu ba empreza Ceslink, maibé kuandu iha reklamsaun tan hosi Oka D’TEL ami  hein atu haree no analiza filafali,” nia afirma.

Entretantu, Diretór Ezekutiva Ceslink SA, Sergio Campos dos Santos, hateten, nia parte lakohi fó kometáriu ba kestaun ne’e tanba ida ne’e parte legál sira mak hatene.

“Ha’u labele fó komentáriu tanba ANC nia kompeténsia hodi deside entrega ka atribui sertifikadu lisensa,” Diretór ne’e dehan.

Notísia Relevante: ANC atribui ona sertifikadu rejistu ba operadór Ceslink

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here