Diretór CJMB, Alcino Lopez, entrega fundu ba ba grupu juventude sira. Imajen Tatoli/Sérgio da Cruz.

BOBONARO, 18 novembru 2021 (TATOLI) — Sekretaria Estadu Joventude no Desportu (SEJD) liuhosi Sentru Joventude Munisípiu Bobonaro (CJMB, sigla portugés), kinta ne’e apoia orsamentu ba grupu juventude 40 iha munisípiu refere ho montante $13,450,00.

Orsamentu ho montante $13,450,00 apoia grupu juventude hosi postu administrativu neen, hodi halo atividade estímula empreendedorizmu sosiál. Orsamentu ne’ebé Governu liuhosi SEJD ba Sentru Juventude Bobonaro hosi (OJE) 2021 hamutuk $60,000.00

Purtantu, Grupu 40 ne’ebé hetan apoia ne’e iha postu administrativu Atabae iha grupu lima (5) pasa ho orsamentu $4,500,00, Bobonaro grupu sia (9) ho totál orsamentu $6,600,00.

Nune’e mós Cailaco grupu rua (2) ho orsamentu $1.750,00, Loloto’e grupu hitu (7) ho montante $5,250.00, Balibo grupu lima $4,000.00 no postu administrativu Maliana hamutuk grupu 12 ho orsamentu $9,500.

Diretór CJMB, Alcino  Lopes, esplika, apoia hirak-ne’e bazea ba rezultadu avaliasaun ba grupu joventude hamutuk 85 nia fatin, no hosi prosesu ne’e grupu 40 mak pasa no merese atu hetan apoia hosi governu hodi dezenvovle sira-nia kreatividade.

“Durante halo avaliasaun ih sira-nia fatin, ami la haree ba kór ka família, entaun ita halo distribuisaun fundu ita halo ba faze dala-rua, primeiru 40% ho montante $13,450.00, depois ezekuta hotu halo relatóriu mai sentru mak ami distribui tán 60%, ami labele fó dala-ida, tanba sei haree ba rezultadu,” nia informa ba jornalista sira, iha salaun administrasaun munisipál Bobonaro, kinta ne’e.

Diretór ne’e esplika, hosi orsamentu hirak-ne’e grupu juventude sira sei halo atividade iha setór agrikultura, liuliu oltikultura no pekuária.

Nia husu ba grupu 40 ne’ebé hetan apoia, atu utiliza osan ne’e tuir atividade ne’ebé submete iha proposta, nune’e bele hakbiit ekonomia família hodi responde ba nesesidade uma-laran.

Iha fatin hanesan, Sekretáriu Autoridade Munisípiu Bobonaro, Júlio Carvalho Caero, agradese no apresia ba polítika VIII Governu nian ne’ebé iha hanoin atu halo mudansa ba juventude sira-nia moris.

“Governu apoia ona ita-boot sira, agora ba oin tenke iha responsablidade atu hatudu ba iha Governu katak apoia ida-ne’e iha duni nia rezultadu pozitivu,” nia fó hanoin ba grupu juventude sira.

Benefisáriu Domingos dos Rego, konsidera programa ne’e bele haforsa liután sira-nia espíritu vontade atu kria kampu traballu ba joven sira seluk ne’ebé iha interese atu investe ninia kreatividade.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here