Mushila realiza “family fun bike” iha Dili. imajen/espesial

DILI, 18 novembru 2021 (TATOLI)– Prezidente klube  Mushila FC no Buibere FC, Farão Belo, informa, hahú koordena ona ho Polísia Nasional Timor-Leste (PNTL) Munisípiu Dili hodi realiza atividade “family fun bike” iha kapital Dili.

“Ami iha ona oráriu fiksu, ne’ebe koordena ho Komandu Munisipiu Dili no Timor Plaza, Banku Nasionál Komérsiu Timor-Leste (BNCTL) no Buibere FC atu hala’o programa family fun bike ho tema for health, for family, for fun, signifika ba familia, ba saúde ba mós kontente, atividade ami sei hala’o iha sábadu (20/11) hodi komemora loron nasionál juventude,” Prezidente Farão, hateten ba Agência TATOLI iha Pateo-Dili, kinta ne’e.

Nia esplika organiza eventu atu halibur família-sira ne’ebé gosta sa’e bisikleta atu promove mós kampaña hadomi saúde.

Rute ba kurida bisikleta sei hahú hosi estrada diresaun Timor-Plaza ba to’o Praia Kokeirus no filafali ba ponte Comoro III to’o aeroportu Comoro, hafoin fila mai finál iha Timor-Plaza ho distánsia kilometru haat.

Nune’e, nia dehan eventu ne’e loke ba públiku no sikilsta profisionál sira partisipa hotu tanba ho objeitivu prinsipál atubele akumula família hotu.

“Inskrisaun ba siklista sira ami loke iha Timor-Plaza, hahú semana kotuk no partisipante sira ne’ebé mai rejista ho osan $2,50 kada ema ida. Ami mós prepara prémiu ba manán na’in hosi primeiru to’o desimu ho valór maioria hosi $25 to’o $300,” nia akresenta.

Partisipante kurida ne’e ne’e sei iha limitasaun to’o ema na’in-200, maibé sei liu sira nafatin simu. Enkuantu hahú inskrisaun to’o agora iha ona ema na’in-115 mak rejistu ona.

Patrosinadór ba eventu ne’e hanesan BNCTL, Malilait bike, Fone house, Timor-Plaza, Fresca, PNTL no seluk tan.

Eventu ne’e, hala’o ba dala-haat ona hanesan iha Dili no Rejiaun Administrativu Espesiál Óe-Cusse no Ambeno (RAEOA).

Alende ne’e, Mushila nia atividade sei realiza mós konsertu múzika hodi halibur artista timoroan-sira hananu hodi anima partisipante-sira

“Objetivu mak hamoris ita nia artista sira, dalaruma osan balun ami hetan iha eventu-sira kria ne’e ami bele fahe malu hanesan,” nia konklui.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here