UPF ho komunidade sira hatún hela objetu ilegál iha postu Alto Lebos. Imajen mídia PNTL.

BOBONARO, 18 novembru 2021 (TATOLI) — Polísia Nasionál Timor-leste (PNTL) liuhosi Unidade Patrullamentu Fronteira (UPF) Kompañia Alfa Alto Lebos, halo apreensaun ba sigarru no fogete ilegál iha suku Lebos, postu administrativu Lolotoe, munisípiu Bobonaro.

Komandante PNTL Munisípiu Bobonaro, Superintendente Antoninho Mauluta, esplika objetu hirak-ne’e parte seksaun investigasaun asegura hela iha komandu hodi kontinua submete ba Ministériu Públiku (MP).

“Sasan sira-ne’e UPF entrega ba komandu munisípiu, sigarru surya 12 ne’e kaixa haat ho totál slop 53 no 373 pakote, iha tán sigarru ida naran pohong sagu kaixa 10 no matahari kaixa ida, no fogete shoot ualu iha pakote 10 no shoot lima, totál fogete hamutuk pakote 30,” nia informa ba jornalista sira iha Maliana, kinta ne’e. 

Komandante PNTL Munisípiu Bobonaro, Superintendente Antoninho Mauluta. Imajen TATOLI/Sérgio da Cruz.

Tuir informasaun ne’ebé Agência TATOLI, asesu iha tersa liubá, oras 21:30 katak Komandante UPF postu Lebos hamutuk ho membru na’in-tolu halo patrullamentu la’o-ain iha área Heramba, suku Lebos baliza entre Lakus área Atambua nian, haree sidadaun balu halo hela atividade ilegál.

Maibé iha momentu ne’e tempu udan no rai nakukun sidadaun hirak-ne’e soe hela sasán no halai lakon ikus mai polísia la konsege kaptura.

“Supeitu hirak-ne’e ita konsidera deskoñesidu, maibé ba oin ita aprezenta objetu hirak-ne’e ba Ministériu Públiku hodi hein notifikasaun, ita koordena ho UPF sei kontinua buka-tuir supeitu sira-ne’e hodi kompleta prosesu investigasaun,” Mauluta akresenta.

Relasiona ho kazu atividade ilegál kontinua rejista iha fronteira terrestre entre Timor-Leste ho Indonézia, komandu PNTL koordena ho UPF, BOP no COE, atu halo vijilánsia rútina iha fatin ne’ebé sempre sai risku ba movimentasaun ilegál.

“Husu ba komunidade katak oras ne’e Covid-19 sei la’o hela, para ona ho atividade ilegál ne’e, tanba lori sasán ilegál no lori mós moras entaun nia impaktu ne’e bele estraga ema hotu nia vida,” nia fó hanoin ba komunidade iha área fronteira.

Entretantu, iha loron 11 novembru liubá, ekipa konjunta hosi Servisu Informasaun Polisia (SIP), UPF, BOP no COE halo apreensaun ba sasán ilegál hanesan sigarru joker kaixa lima no adubu hare nian kaixa rua, iha área Saban, suku Holsa no Ramaskora, suku Raifun, postu administrativu Maliana, munisípiu Bobonaro.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here