PA RAEOA hatuur fatuk dahuluk instala liña eletrisidade iha Pante Makasar. Imajen/mídia ZEESM.

OÉ-CUSSE, 18 novembru 2021 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e hatuur fatuk dahuluk ba instalasaun iluminasaun liña eletrisidade iha aldeia Lakufoan, suku Costa, sub-rejiaun Pante Makassar.

“Ohin, iha Pante Makasar ba suku Costa no Naimeco, liuliu iha fatin izoladu Lakufoan ho Bubuneo, fatin rua ne’e moris iha nakukun tinan barak ona, entaun autoridade hakarak iha tinan ne’e komunidade Oé-Cusse sei moris iha naroman, tanba ne’e ita ohin hahú lansa ba fatin sira-ne’e tanba dook hosi rede distribuisaun,” Arsénio Paixão Bano, informa ba Agência Tatoli iha Oé-Cusse.

Ezekutivu ne’e fó sai katak, instalasaun liña eletrsidade iha Lakufoan sei rezolve família uma-kain 112 ho populasaun hamutuk 400-resin.

Nia espera empreza serbisu hamutuk ho komunidade iha instalasaun liña eletrisidade ne’e, tanba projetu ne’e sei fó tulun estudante sira fasil ona atu estuda no ajuda mós komunidade atu hala’o atividade saida de’it.

“Ha’u husu sei bele iha festa Natál no tinan foun komunidade bele kontente ona,” Prezidente Autoridade apela ba kompañia.

Xefe suku Costa, Aleixo Abi, agradese ba autoridade tanba hahú ona halo instalasaun eletrisidade ba komunidade, liuliu iha foho fatin izoladu sira, tinan barak uza de’it mina-rai, maibé hela de’it fulan-rua mai kontente ona.

“Ha’u lori komunidade suku Costa nia naran hakarak agradese ba autoridade, tanba mumentu ami hatama proposta iha fulan hirak liuba, no ohin mai responde,” nia katak.

Purtantu, empreza Grand Enclave Unipesoál, Lda, sei halo instalasaun liña eletrisidade kobre iha sub-rejiaun Pante Makassar ba área izoladu sira iha aldeia Lakufoan, suku Costa, no bairru izoladu Bubuneu suku Naimeco, hodi rezolve uma-kain 112 ho populasaun 461, ho distánsia kilemótru 1-resin.

Entretantu, projetu ne’e ezekuta hosi empreza Grand Enclave Unipesoál, Lda, ho valór kontratu $329, 849,39 ne’ebé aloka hosi Orsamentu Jerál Estadu (OJE) 2021 ho durasaun kontratu loron 120. Instalasaun iha Pante Makassar iha empreza rua, ida ida lansa ona no hela ida seidauk lansa tanba área sub-rejiaun ne’e luan.

Notísia relevante: PA RAEOA hatuur fatuk dahuluk instala liña eletrisidade iha Oésilo

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here