Vise-Primeiru-Ministru no Ministru ba Planu no Ordenamentu, José Maria dos Reis, hala’o intervesaun iha ámbitu seminariu nasionál kona-ba sistema informasaun jeografia. Imajen/ média Vise-PM no MPO.

DILI, 18 novembru 2021 (TATOLI)— Ministériu Planu no Ordenamentu (MPO) realiza semináriu nasionál hodi selebra loron mundiál ba Sistema Informasaun Jeografia (SIG), ho objetivu fó oportunidade ba instituisaun hotu bele fahe sira nia esperiénsia no koñesimentu sira entre espesialista no utilizador sira iha Timor-Leste.

Iha biban ne’e, Vise-Primeiru-Ministru no Ministru ba Planu no Ordenamentu, José Maria dos Reis,  esplika importansia SIG nian ba serbisu Ministériu Planu no Ordenamentu nian, liuliu  oinsá atu hala’o objetivu prinsipal sira, hanesan estudu, planeamentu no proposta ba Polítika Nasionál Ordenamentu Territóriu, liuhusi dezenvolvimentu instrumentu planeamentu teritoriál sira.

Vise-Primeiru-Ministru no Ministru ba Planu no Ordenamentu, José Maria dos Reis. Imajen/ média Vise-PM no MPO.

“Ita hatene ona katak importante tebes atu iha Sentru Nasionál Informasaun Jeoespasial (CNIG) no importante mós ita nia esforsu no determinasaun ba nia dezenvolvimentu. Maibé, ita tenki rekoñese mos katak ita enfrenta difikuldadi no dezafiu lubuk ida,” Vise PM ne’e hateten liuhosi nota ne’ebé Agência TATOLI asesu, kinta ne’e.

Governante ne’e dehan bainhira informasaun laiha kualidade, tanba razaun saida de’it, ikus desizaun sira, liuliu desizaun sira ne’ebé importante ho natureza estratéjika ba dezenvolvimentu nasaun, sei laiha kualidade mós.

‘Ita presiza mós informasaun jeografia ho kualiadade atu foti desizaun sira kona-ba oinsa atu utiliza ita nia territóriu no ita nia rai, hodi dezenvolve ita nia nasaun, liuhosi dezenvolvimentu ho objetivu atu determina mudansa ba moris ita nia povu nian, no nuudar estimulu atu hasae padraun ba ekuidadi, sustentabilidade no dignidade ema nian,” Governante ne’e akresenta.

Loron mundial SIG nian, selebradu iha mundu tomak hodi promove Sistema Jestaun Informasaun Geografia no teknolojia sira ne’ebé asosiadu.

Jornalista  : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here