Parada hosi membru F-FDTL. Imajen/ António Goncalves

DILI, 18 novembru 2021 (TATOLI)—Ministéiru Defeza (MD) no Falintil-Forsa Defeza Timor-Leste (F-FDTL) prevee millaun $36 iha Orsamentu Jerál Estadu (OJE) 2022.

“Ba tinan oin, Ministéiru Defeza no F-FDTL prevee millaun $36 ho nia foku prioridade ba seguransa liu-liu eleisaun prezidensiál 2002 no eleisaun parlamentár 2023,” Ministru Defeza, Filomeno Paixão de Jesus, hateten ba jornalista sira hafoin halo audiénsia públika ho komisaun C Parlamentu Nasionál iha Parlamentu Nasionál, kinta ne’e.

Ministéiru Defeza (MD) prevee $10,934,731 hodi aloka ba saláriu vensimentu $1,404,635, bens servisu $6,278,204, kapitál menór $1,761,642, kapitál dezenvolvimentu $1,490,250 no transferénsia públika laiha.

Hosi orsamentu ne’e sei finansia ba programa tolu (30), sub-programa lima (5) no atividade 21.

Governante ne’e informa, MD nia ezekusaun OJE 2021 ne’e ainje ona besik 70% hodi ezekuta liu-liu ba bens servisu no saláriu vensimenu.

Maibé, nia dehan, projetu konkursu ró nian la konsege finaliza tanba iha prosesu kompañia husu montante boot, nune’e sei kontinua ba tinan oin no iha mós infraestrutura ba sede iha kuartél jenerál no fatin militár iha Beduku atraza, tanba seidauk aserta ba dezeñu nune’e influensia iha ezekusaun sei kiik.

Orsamentu bazea ba programa

Tuir livru 2 planu anuál OJE 2022, MD ho programa defeza nasionál sei gasta $8,796,389,  programa boa-governasaun no jestaun instituisionál sei gasta $2,063,461 no programa igualdade  jéneru no inkluzaun sosiál sei gasta $74,881.

Programa defeza nasionál ho nia objetivu médiu prazu populasaun Timor-Leste seguru no proteje konta ameasa externa.

Sub-programa defeza militár ho ninia atividade mak kooperasaun defeza militár, dezenvolve sistema komandu no kontrola, dezenvolve no kapasita sistema autoridade máritima, konstrusaun infraestrutura foun defeza no militár, akizisaun ekipamentu no materiál ba militár, reparasaun no manutensaun infraestrutura, ekipamentu no arma militár, reparasaun no manutensaun ekipamentu ró militár no atividade asisténsia saúde militár.

Sub-programa formasaun no dezenvolvimentu rekursu umanu iha área defeza no seguransa no nia atividade mak formasaun no kapasitasaun rekursu umanu Ministéiru Defeza no F-FDTL, rekrutamentu militár no funsionáriu Ministériu Defeza.

Entretantu, programa boa-governasaun no jestaun instituisionál ho nia sub-programa rua no atividade sia.

Programa igualidade jéneru no inkluzaun sosiál ho nia sub-programa implementasaun NAP-rezolusaun 1325 (2000) ONU kona-ba WPS, ho nia atividade promove lideransa no kapasidade feto iha F-FDTL, sosializasaun ba insetiva feto miliár implementa abordajen integradu igualidade jéneru.

F-FDTL prevee $25,527,233

Enkauntu F-FDTL prevee $25,527,233 iha OJE 2022, hodi aloka ba saláriu vensimentu $10,756,000, bens servisu $14,771,233, kapitál menór, kapitál dezenvolvimentu no transferénsia públika laiha, hosi orsamentu ne’e hodi finansia programa tolu, sub-programa lima no atividade 11.

Orsamentu bazea programa

Programa defeza nasionál sei gasta $22,930,372, programa boa-governasaun no jestaun instituisional sei gasta $2,566,861 no programa igualidade jéneru no inkluzaun sosiál sei gasta $30,000.

Programa defeza nasionál ho nia sub-programa defeza militár nia atividade mak garante misaun operasionál F-FDTL, moderniza infraestrura no ekipamentu militár.

Sub-programa rekursu umanu ba prestasaun servisu ho nia atividade jestaun rekursu umanu ba prestaun servisu.

Ba iha programa boa-governasaun no jestaun instituisional ho nia sub-programa rua no atividade haat.

Purtantu, programa igualidade jéneru no inkluzasaun sosiál ho nia sub-programa implementasaun NAP-rezolusaun 1325 (2000) ONU kona-bá WPS ho nia atividade estabelese unidade jéneru, aspeitu integradu jéneru iha kuríkulu, promove lideransa no kapasidade feto iha F-FDTL, sosializasaun motiva feto iha militár no implementasaun abordajen integradu igualidade jéneru.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here