Ekipa futebol. imajen espesial

OÉ-CUSSE, 17 novembru 2021 (TATOLI) — Ekipa hosi Sarankeu FC halakon ekipa jogadór hosi FC Villanos iha liuhosi suta penalidade iha Kopa Assosiasaun Futeból Oé-Cusse (AFO) sub-22 ho rezultadu 4-3 iha 16 finál nune’e Sarankeu FC ne’ebé komanda hosi Sebastião Oqui haka tba 8 finál.

Jogu 16 finál ne’e realiza iha kampu Futeból Oébau, Rejiaun Administrativa Espesiál Oé-Cusse Ambeno (RAEOA), iha kuarta ne’e, FC Sarankeu hakat ba 8 finál hodi hein ekipa FC Bimenikibo hasoru FC Oémolo sei joga iha sesta (19/11) semana ne’e.

Jogu ne’e hahú iha primeira parte ho durasaun menutu 45, ne’ebé dominante hosi ekipa FC Sarankeu, nune’e jogadór Mariano Sacramento ho númeru kamizola 6, lansa golu ida iha menutu 10. Iha jogu primeira parte termina ho rezultadu 1-0.

Hakat ba jogu segunda parte ho durasaun menutu 45, ekipa FC Villanos hahú hatudu tátika foun hodi troka jogadór sira. Ho tátika foun ne’e iha duni rezultadu, tanba to’o menutu 63 jogadór Ricardo Taimenas ho númeru kamizola 8 lansa golu ida hodi muda rezultadu 1-1.

Durante jogu segunda parte la’o to’o kompleta tempu menutu 90, ekipa rua ne’e hatudu forsa hanesan maski lansa ameasa ba malu ba guarda sira maibé la rezulta golu ruma.

Tanba jogu ho durasaun menutu 90 ekipa rua produs rezultadu hanesan, nune’e árbitru aumenta-tán extra time durante menutu 30 hodi buka vensedór iha 16 finál hodi hakat ba 8 finál. Maibé rezultadu mantein ho 1-1.

Nune’e árbitru sira lori-tán ekipa rua ne’e ba iha faze final liuhosi suta penalidade, kada ekipa deside jogadór na’in-lima reprezenta klubu hodi suta penalidade.

Iha suta penalidade  dahuluk, hahú hosi ekipa FC Villanos, liuhosi jogadór Fransisco Taimenas númeru kamizola 4 konsege lansa golu, no tuir kedas ekipa FC Sarankeu liuhosi jogadór Joseferino Anin númeru kamizola 7 lansa golu ida hodi hatuur score 1-1.

Tuir mai, jogadór António da Costa númeru kamizola 6 hosi FC Villanos lansa golu, tuir kedas FC Sarankeu liuhosi jogadór Januário Oqui númeru kamizola 10 lansa-tán golu ida hodi muda score 2-2.

Pinalidade datoluk, ekipa FC Sarankeu sorti liu tanba jogadór Fransisco Monteiro hosi FC Villanos númeru kamizola 12 la prodús golu tanba lakona alvu ba guarda rede, nune’e halo jogadór Romário Oqui númeru kamizola 14 hosi FC Sarankeu hatudu nia vontade lansa golu, hodi muda ba score 3-2.

Ho rezultadu ne’e, lori sorti di’ak ba ekipa FC Sarankeu, tanba tama fali ba penalidade dahaat, jogadór FC Villanos, Eugidio Neves, númeru kamizola 9 nafatin la prodús golu, nune’e fó oportunidade ba jogadór FC Sarankeu Mariano Sacramento númeru kamizola 6 lansa-tán golu ida hodi muda score ba 4-2.

Purtantu hakat fali ba pinalidade ikus, jogadór Ricardo Taimenas númeru kamizola 8 hosi FC Villanos lansa golu, tuir kedán jogadór, Alexandrino Bere, númeru kamizola 5 hosi FC Sarankeu la produs golu, nune’e jogu termina iha adu pinálti, ho rezultadu ikus FC Sarankeu lidera ho score 4-3.

Ho rezultadu ne’e, treinadór ekipa FC Villanos, Fransisco Remedios, orgullu ba ekipa rua tanba hatudu jogu ho kualidade no lansa forsa hanesan, to’o liuhosi suta penalidade.

“Lakon ka manán buat jogu mak hanesan ne’e, ita agradese tanba ekipa rua ne’e hatudu forsa hanesan hosi dada to’o sutu penalidade mak ami lakon,” nia katak.

Purtantu treinadór FC Sarankeu, Sebastião Oqui, admira tanba jogadór sira hatudu forsa no disiplina to’o hetan rezultadu hodi hakat ba 8 finál, no sei preparadu hodi kompete iha 8 finál ho jogu kualidade.

“Ha’u orgullu tanba jogu atu manán ka lakon importante disiplina, hodi hatudu ita-nia talentu iha kampu-laran, ohin ita observa jogu ne’e naruk tebes maibé laiha problema no kartaun mean, ida ne’e maka sai valór ba ita adeptu sira, ami-nia mehi no esforsu hakarak to’o 4 finál,” nia orgullu.

Entretantu, jogu ho durasaun 120 menutu inklui extra time ne’e lidera hosi árbitru Rodrigo Teixeira, asistente dahuluk Benedito da Conceição, asistente daruak Miguel Colo.

Notísia relevante: Kopa AFO, Zinter FC ‘dere’ FC Fini ho 3-1

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here