Xefe suku Lourba, postu administrativu Bobonaro, munisípiu Bobonaro, Lino de Jesus. Imajen Tatoli/Sérgio da Cruz.

BOBONARO, 16 novembru 2021 (TATOLI) – Komunidade suku Lourba, postu administrativu Bobonaro, munisípiu Bobonaro, susar tebes atu asesu bee-moos iha tempu udan no fulan ida ona konsumu udan-been.

Xefe suku Lourba, haktuir, hahú hosi fulan-juñu to’o outubru, komunidade sira asesu bee-moos sosa de’it hosi tanki  ho folin karreta ida $40 dolar, bidón ida $2 dolar no masa litru-lima ida $0,50 sentavu, maibé daudaun ne’e komunidade la utiliza ona tanba kompañia xupa bee foer mak fa’an ba sira.

“Agora udan iha fulan kotuk ne’e, tanki labele tama ona, susar liu mak agora tempu udan, entaun kada loron komunidade sira tenke ba tá-au tidin iha uma tatis atu udan-been tama iha bidón hodi konsumu kada loron,” nia informa ba jornalista sira, iha salaun administrasaun munisipál Bobonaro, tersa ne’e.

Xefe suku ne’e fó-sai katak, durante ne’e komunidade sira dependénsia liu ba bee-matan iha suku Tapo nian, maibé iha tempu bailoron débitu bee-menus, labele distribui to’o suku Lourba, tanba suku sia (9) iha postu administrativu Bobonaro uza de’it bee-matan ida.

Ho nune’e obrigatóriu komunidade sira tenke sosa bee-moos no ba sira-ne’ebé laiha kapasidade ekonomia, tenke la’o-ain kilómetru tolu-resin mak foin asesu bee-moos iha mota, maibé iha tempu udan labele asesu tanba bee-merak.

Tuir nia, ho problema hirak-ne’e, parte autoridade lokál no komunidade sira la fo kulpa ba governu tanba dezde 2002  kria ona kondisaun ba sira, maibé tanba mudansa klimátika fornesimentu bee la to’o ba komunidade sira, tanba ne’e nafatin rekomenda ba parte kompetente atu apoia orsamentu nune’e bele halo perfurasaun bee-moos iha suku ne’e.

“Ami identifika ona fatin, atu fura iha área natar fatin ne’e, maibé ida-ne’e só presiza Governu nia apoia, tanba komunidade sira maioria agrikultór entaun laiha kbit atu fura rasik,” nia katak.

Líder komunutáriu ne’e aprezenta direita ba Prezidente Parlamentu Nasionál (PPN), Deputadu Aniceto Longuinhos Guterres Lopes, bainhira halo kampaña vasinasaun iha postu administrativu Bobonaro, no hato’o beibeik ba SAS Bobonaro liuhosi relatoriu, maibé to’o agora seidauk rezolve.

Enkuantu fasilidade estadu ne’ebé iha suku Lourba ba mak hanesan eskola hahú hosi pre-eskolár to’o ensinu báziku sentrál Gumer no sentru saúde Kakanea.

Totál Populasaun iha suku Lourba hamutuk 1.984 komposta hosi feto  990 no mane 994 ho totál xefe-família 434.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here