Diretora Jerál Adimistrasaun no Polítika hosi Ministériu Justisa, Marcelina Tilman. Imajen TATOLI/Francisco Sony

DILI, 18 novembru 2021 (TATOLI)-Komisaun Luta Kontra Tráfiku Umanu, iha kinta ne’e, realiza reuniaun hamutuk Governu hodi konserta hanoin ida ba preparasaun planu asaun luta kombate krime tráfiku umanu iha Timor-Leste.

Hosi parte Governu envolve Primeiru-Ministru no Ministru Interiór, Taur Matan Ruak, Ministru Prezidénsia Konsellu Ministru, Fidelis Manuel Leite Magalhães, Ministru Justisa, Manuel Cárceres da Costa, no Vise-Ministru Interiór, António Armindo.

Prezidente Komisaun no atuál Diretora Jerál Administrasaun no Polítika ba Justisa hosi Ministériu Justisa, Marcelina Tilman da Silva, informa, liuhosi reuniaun ne’e komisaun simu orientasaun hosi ezekutivu kona-ba preparasaun serbisu luta kontra tráfiku umanu.

“Orientasaun ne’e liliu kona-ba preparasaun ba medida saida mak bele halo, hanesan planu asaun ba tráfiku umanu no oinsá atu halo prevensaun no protesaun ba atividade ilegál ne’e. Planu ne’e sai hanesan mata-dalan ida atu nune’e membru komisaun bele hala’o serbisu,” Prezidente Komisaun relata hafoin reuniaun, iha Palásiu Governu.

Notísia relevante: Governu-parseiru tau esforsu hamutuk luta hasoru krime tráfiku umanu

Tuir Marcelina Tilman, presiza halo planu asaun ne’ebé adekuadu no própriu hodi kombate krime tráfiku umanu tanba durante ne’e krime ne’e eziste maibé seidauk iha levantamentu.

“Durante ne’e rejista krime tráfiku umanu, maibé ha’u la fiksa númeru, maibé iha duni tanba iha prizaun iha mós dadur feto ida ka rua,” nia haktuir.

Membru komisaun sira ne’e kompostu hosi entidade relevante sira hanesan Ministériu públiku, Polísia Sientífiku Investigasaun Kriminál (PCIC, sigla portugés), Ministériu Negósiu Estranjeiru no Kooperasaun (MNEK), Ministériu Interiór, Polísia Nasionál Timor-Leste (PNTL), Servisu Migrasaun, no organizasaun sira hanesan ALFELA.

Foin lalais, Governu liuhosi Ministériu Interiór (MI), Prezidénsia Konsellu Minustru (PCM, sigla portugés), hamutuk ho parseiru internasionál hanesan Organizasaun Internasionál Migrasaun (IOM, sigla inglés), Organizasaun Nasaun Unida (ONU), no ekipa Embaixada Austrália, halo enkontru hodi tau hanoin hamutuk luta hasoru krime tráfiku umanu.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here