Seremónia esntrega apoiu iha indústria kafé ba ACTL. Imajen/MTKI

DILI, 18 novembru 2021 (TATOLI)–Embaixadór Repúblika Populár Xina iha Timor-Leste halo kooperasaun ho Ministériu Turizmu, Komérsiu no Industria (MTKI), entrega cheque ba Asosiasaun Kafé Timor-Leste (ACTL, sigla portugés) hodi apoiu indústria kafé.

“Objetivu hosi kooperasaun ne’e atu halo reabilitasaun planta no mellora laboratóriu kafé hodi hasa’e kualidade kafé iha merkadu nasionál no internasionál,” Embaixadór Repúblika Populár Xina iha Timor-Leste, Xiao Jiagou, hateten, liuhosi nota ne’ebé Agência TATOLI asesu, kinta ne’e.

Tanba ne’e, serbisu indústria Kafé Timor-Leste sei kolabora ho kafé na’in sira, grupu ka kooperativa kafé, kompradór ka sosa na’in, exportadór, inklui restorante sira.

Iha biban hanesan, Vise-Ministru Turizmu, Komérsiu no Industria, Domingos Lopes Antunes, agradese ba apoiu hosi Governu xineza ba setór kafé iha Timor-Leste, liuliu ba ACTL ne’ebé nia membru maihosi setór privadu no kooperativa, tanba VIII Governu konstitusionál liuhosi MTKI iha mandatu atu fasilita no elabora polítika hodi suporta setór privadu inklui asosiasaun sira ne’ebé halo atividade ekonómika iha área turizmu.

“Timor-Leste nia ekonomia tun kuaze 7% durante pandemia COVID-19 liuliu iha tinan kotuk, ne’ebé hanesan persentajen boot hafoin Timor-Leste hetan restaurasaun independénsia, setór privadu barak mós hetan efeitu negativu ba negósiu to’o balun tenke taka atividade, maibé ho intervensaun oin-oin hosi Governu hahú hosi tinan kotuk to’o mai agora, ba programa moratóriu kréditu, subsídiu ba setór privadu, Cesta Bázika, kréditu suave no seluk tan, hanesan parte ida hosi planu rekuperasaun ekonómia, ajuda tebes,” governante ne’e dehan.

Nune’e, Vise-Ministru enkoraja ACTL atu kontinua halo serbisu, tanba parte ministériu sei fasilita atividade atu mellora no haburas indústria kafé ne’ebé kontribui tebes ba ekonomia Timor-Leste.

“Liuhosi apoiu ne’e, serteza membru ACTL mak hetan benefísiu, tanba hanesan asosiasaun ne’ebé halibur setór privadu sira iha indústria kafé. Apresia tebes ba ita-boot sira-nia esforsu durante ne’e,” governante ne’e akresenta.

Maski nune’e, nia konsidera, serbisu barak mak presiza halo iha kadeia valór kafé, hasa’e produtividade no kria mekanizmu ba produtór sira hodi asesu informasaun atuál ba presu nó kualidade.

“Ba ida-ne’e, presiza serbisu hamutuk entre parseiru dezenvolvimentu no Governu, ho ninia kbiit tomak sei fasilita liuhosi estabelesimentu infraestrutura no enkuadramentu nesesáriu ba dezenvolvimentu indústria ne’e,” nia dehan.

Tuir governante ne’e, kafé Timór nia kualidade di’ak tebes iha mundu, ne’ebé sempre hetan apresiasaun hosi país seluk inklui Xina ne’ebé hanesan maiór parseiru komérsiu ba exportasaun kafé no produtu agríkola seluk.

“Agora ita tenke halo ezersísiu boot atu hasa’e produtividade produsaun kafé iha rai-laran no transforma setór ne’e ba semi-indústria ka indústria hodi aumenta valór akresentadu kafé,” Vise-Ministru fó hanoin.

Aleinde ne’e, MTKI prepara ona dekretu-lei kona-ba regra orijen hodi sertifika originalidade produtu Timór, maski durante ne’e liuhosi Diresaun Komérsiu Externu hasai ona sertifikadu orijen, maibé espesifikamente ba kafé de’it.

Nune’e mós, liuhosi Institutu Kualidade Timor-Leste (IQTL, sigla portugés) sei kria mós dekretu-lei ba sertifikasaun ai-han orgániku hodi nune’e Timor-Leste nia produtu ne’ebé exporta sei iha valór ekonomia a’as liután tanba produtu sira ne’e orgániku.

“Ba ACTL no parseiru sira hotu, mai ita hamutuk kontinua mellora setór kafé ne’e hanesan dinamizadór ekonomia rai-laran no hadi’a kondisaun vida agrikultór kafé sira,” nia enkoraja.

Seremónia ne’e partisipa hosi Sekretáriu Estadu Kooperativa Elizário Ferreira, Prezidente ACTL Evangelino Soares Monteiro, Vise ACTL Afonso de Oliveira, Diretór Ezekutivu TradeInvest Arcanjo da Silva, Reprezentante WFP iha Timor-Leste Dageng Liu, Reprezentante WHO, no entidade relevante seluk.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here