Sekretáriu Jerál FFTL, Nelio Isaac Sarmento. imajen/media FFTL

DILI, 18 novembru (2021)- Federasaun Futeból Timor-Lesta (FFTL) liuhosi Diresaun Arbitrajen, kinta ne’e, realiza tan formasaun ba árbitru nain-41 liuhusi forma virtuál atu kontinua atualiza koñesimentu arbitrajen iha mundu futeból.

Iha abertura, Sekretáriu Jerál FFTL, Nelio Isaac Sarmento, fó hanoin ba partisipante sira kontinua atualiza sira-nia koñesimentu iha arbitrajen, nune’e labele atrazadu hosi mudansa ne’ebé akontese iha mundu futeból.

“Koñesimentu kontinua atualiza atubele iha koñesimentu foun tuir mudansa ne’ebé akontese, katak árbitru sira tenke kontinua up-to-date.  Tanba ita mós espera katak árbitru timoroan sira bele loron ida lidera mós kompetisaun sira iha nivél Asia nian,” Sekretáriu Jerál FFTL ne’e, hateten, liuhosi nota ne’ebé Agência TATOLI asesu, kinta ne’e.

Nia mós husu árbitru sira atu nafatin aprende hodi haklean sira-nia koñesimentu hodi sai árbitru ne’ebé profesionál.

Sekretáriu Jerál FFTL mós agredese instrutór Mohamad Rodzali Yacob ne’ebé kontinua disponivél hodi fahe nia koñesimentu no esforsu ba dezenvolvimentu arbitrajen iha Timor-Leste.

“Rodzali halo ona esforsu barak ba dezenvolvimentu arbitrajen no ohin loron ita iha ona arbitru barak. Ita agradese nia tanba nia nafatin tulun dezenvolvimentu arbitrajen liuhusi formasaun,” Nelio afirma.

Liuhosi virtuál, Ofisiál Dezenvolvimentu Arbitrajen FIFA, Mohamad Rodzali Yacob, afirma katak atu avansa ba oin labele para aprende, tanba aprende barak bele aumenta ita-nia koñesimentu hodi halo iha avansu liutan.

“Atu avansa ita tenke aprende nafatin. Ohin hanesan inisiu ida ba ita boot sira, maibé ha’u espera katak ho formasaun beibeik hanesan ne’e árbitru timoroan sira bele lidera jogu sira iha Asia iha futuru. Ita kontinua halo esforsu atu dezenvolve arbitrajen iha Timor-Leste,” nia akresenta.

Notísia Relevante: FFTL fó formasaun ba treinadór futsal

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here